Turun mərkəzi oyununda ən yaxın izləyicisi “Lans”ı məğlub edən PSJ çempionluğa doğru böyük addım atdı. Əlbəttə, rəqibin 19-cu dəqiqədə azlıqda qalması da son nəticəyə təsir göstərdi. Bu komandanın məğlubiyyətindən yararlanan “Marsel” 2-ci pilləyə qalxdı. Elə “Monako” da qələbə imkanını əldən vermədi. “Lill”, “Renn” və “Lion” da həftənin qalibləri arasındadı.

30 turdan sonra “Lans”ı cəmi 6 xal qabaqlayan PSJ ilk dövrədə bu rəqibə uduzmuşdu (1:3). Əksər ekspertlər “qan-qızılılar”dan ciddi müqavimət gözləsələr də, 19-cu dəqiqədə oyunun sonrakı axarını müəyyənləşdirən hadisə baş verdi. Qonaqların dayaq yarımmüdafiəçisi Əbdül Səməd arxadan Hakiminin topuğuna zərbə vurduğuna görə birbaşa “qırmızı” ilə meydandan qovuldu. Təbii ki, belədə PSJ-nin təzyiqi bir qədər də artdı. 31-ci dəqiqədə gözəl hücum sonucunda Vitinya cərimə meydançasında Mbappeni tapdı, onun zərbəsindən sonra dirəyə dəyən top tora daxil oldu. 6 dəqiqə sonra isə Vitinya özü uzaqdan hiyləgər zərbə ilə fərqi artırdı. 40-cı dəqiqədə Mbappedən daban ötürməsi alan Messi hesabı darmadağın həddinə çatdırdı. Qonaqlar 2-ci hissədə bu qollardan birinin əvəzini çıxa bildi. Ruisin əllə oyununa görə təyin olunan penaltini Frankovski dəqiq yerinə yetirdi. PSJ bu qələbə sayəsində “Lans”la xal fərqini 9-a çatdırdı.

“Lans”ın bir gün əvvəl uduzmasından xəbərdar olan “Marsel”in autsayder “Trua”nı məğlub etməkdən başqa yolu yox idi. Artıq 2-ci dəqiqədə Vitinya Fransa çempionatında qol hesabını açdı. Xatırladaq ki, “Marsel” 23 yaşlı portuqaliyalıya görə “Braqa”ya 32 milyon avro ödəyib. 40-cı dəqiqədə cənubluların türkiyəli ulduzu Ündər də fərqləndi. Vitinya 64-cü dəqiqədə dublunu rəsmiləşdirəndə artıq “Marsel”in qələbəsinə şübhə yeri qalmadı. 90+1-ci dəqiqədə cari mövsümdə 10-cu qolunu vuran Balde “Trua”nın böyükhesablı məğlubiyyətini əngəllədi.

“Loryan”ı qəbul edən “Monako”nun qələbəsində Qolovin böyük rol oynadı. 14-cü dəqiqədə rusiyalı yarımmüdafiəçinin uzaq dirək önünə ötürməsi zamanı səkən top Diattanın sinəsinə dəyib tora düşdü. 28-ci dəqiqədə təkbətək çıxan Qolovin fərqi artırdı. 2-ci hissənin əvvəlində Folland da adını tabloya yazdırdı. Bu hücumu da Qolovin başlamışdı. “Qırmızı-ağlar” 3:0-dan sonra hesabı qorumağa başladı, “Loryan”, sadəcə, təslim oldu. Hər halda, 86-cı dəqiqədə Maripanın Koneyə qarşı kobud oyununa görə təyin olunan penaltini reallaşdıran zərərçəkən komandasının təsəlli qolunu vurdu.

“Monpelye”ni qəbul edən “Lill” aşkar üstün təsir bağışlasa da, 24-cü dəqiqədə topu öz qapısında gördü. Paulo Fonseka fasilədə üçlü dəyişikliyə əl atmaqla “şimallı itlər”in oyununu bir qədər də gücləndirdi. 70-ci dəqiqədə mövsümdə 20-ci qolunu vuran Devid hesabı bərabərləşdirdi. İki dəqiqə sonra isə Kabella “Lill”i irəli çıxardı.

“Renn” evdə “Reyms”i darmadağın etdi. Bu oyunun qəhrəmanı dubl edən Dokyu oldu. 6-cı pillədə qərarlaşan “Renn” “Lill”dən 2 xal geri qalır. “Lion” isə 7-ci yerdədi. “Şirlər” hesabat turunda “Tuluza”dan üstün oldu.

Turun qalan nəticələrinə gəlincə, aşkar autsayder “Anje” mövsümdəki 23-cü məğlubiyyəti “Klermon”dan aldı. 19-cu yerdə isə bu dəfə səfərdə birbaşa rəqibi “Strasbur”a uduzan “Ayaçço” qərarlaşıb.

Turun rəqəmi
72 – PSJ 31-ci turda xalını bu həddə çatdırdı. Fransa çempionatında qələbəyə görə 3 xal verildiyi vaxtdan bəri yalnız 8 komanda 31 turdan sonra bu qədər və daha artıq xal toplayıb, sonda hər biri çempion olub.

Turun ulduzu
Kilian Mbappe (PSJ) – qol vurdu, Messinin fərqlənməsinə şərait yaratdı, oyunboyu “Lans” müdafiəsini gərginlikdə saxladı. Ümumiyyətlə, başqa problemlərlə “yüklənməyən” və formada olan Kilian, sadəcə, qarşısıalınmazdı ki, “qan-qızılılar” bunu öz üzərində hiss etdi.

Faktlar

* PSJ-nin heyətində ölkə çempionatında 139-cu qolunu vuran Mbappe Kavanini (138) arxada qoymaqla klub tarixinin bombardiri oldu. Onun 2017/18 mövsümündən bəri parislilərin şərəfini qoruduğunu da xatırladaq.

* Qolovin karyerasının ən məhsuldar mövsümlərindən birini keçirir. Cari mövsümdə 7 qol vuran və 7 məhsuldar ötürmə verən rusiyalı xavbek indiyə qədər yalnız bir dəfə - 2020/21 mövsümündə “qol+ötürmə” sistemi üzrə 14 xal toplaya bilmişdi. Onda Qolovinin hesabında 5 qol və 9 ötürmə var idi.