Saxtakarlar! - KÖŞƏ
İdman prinsipini pozmaqda kim maraqlıdı: futbol qurumları, yoxsa məşqçilər?
Aprelin 14-də keçirilən “Zirə” – “Səbail” oyunundan sonra qonaqların çalışdırıcısı Şahin Diniyev belə açıqlama verib:
“Mən elitadan kiminsə çıxmasını istəmirəm. İnanın, 4 komandadan biri aşağı liqaya düşsə, biz çox şey itirəcəyik. Bu komandalar autsayder deyil, digər rəqiblərlə başabaş mübarizə apara bilirlər. Sayı azaltmaq əvəzinə artırmaq lazımdı. Kiminsə elitadan çıxması bizə nə verəcək? Bütün komandalar premyer-liqada qalmalıdı. Hazırda "Səbail"də 180-ə yaxın adam işləyir, birdən-birə onların üstündən xətt çəksək, sonra divizondan qaytara biləcəyik?"
Aydın məsələdi ki, Diniyev 4 komanda deyərkən “Səbail”lə yanaşı, “Kəpəz”, “Sumqayıt” və “Şamaxı”nı nəzərdə tutur. Şahin bəyin dediklərindən ilhamlanan həmkarlarım bu üç komandanın çalışdırıcısından da münasibət öyrənib. İndi isə onları dinləməyin tam zamanıdı.
Tərlan Əhmədov:
“İstəmərəm ki, bu il hansısa komanda birinci diviziona düşsün. Hətta istərdim ki, "Xəzər Lənkəran", "Zaqatala", "Şəmkir" qayıtsın. Klub sayının artırılmasını istəyərdim. Hər halda, necə olacağını zaman göstərəcək. Hansı qərar olacaq, ona da hörmətlə yanaşacağıq. Biz hələ qalmağı təmin etməmişik. İstəyərəm ki, klub sayı artırılsın. Çünki regionlarda futbol olmalıdı. İndiki vəziyyətdə güzəşt olunması daha yaxşıdı”.
Samir Abasov:
“Biz bu işin içindəyik və kiminsə elitanı tərk etməsini istəmirik. Artıq 12 ildi "Sumqayıt" qurulub. İndi-indi akademiyamızda nəsə görürük. Birini çıxmaqla qalan akademiyalardan yaxşıyıq. Yenidən komanda qurmaq, ora maraq qatmaq çətindi. Düzdü, idman prinsipləri pozulur, amma düşünürəm ki, premyer-liqadan kiminsə çıxması həmin şəhərin futboluna təsir edəcək. Daha yaxşı olar ki, bir-iki komanda gəlsin elitaya”.
Vüqar Əsgərli:
“Çempionat başlamamış bilirdik ki, bir klub diviziona düşəcək. Amma çox istərdim ki, heç bir komanda premyer-liqanı tərk etməsin. Bütün komandalar yaxşı işlər görür. Biz də sona kimi mübarizə aparacağıq”.
Elitada qalması təhlükə altında olan bu 4 məşqçinin dedikləri ilə kifayətlənmək, yazıya nöqtə qoymaq mümkündü. Amma... Adam, sadəcə, yanıb-tökülür. Görürsüzmü, aralarında necə ideal, sinxron anlaşma var. Azərbaycan futbolunun bugünü etibar olunan mütəxəssislərdən dördü sanki sözləşibmiş kimi idman prinsiplərinin ayaqlar altına atılmasının, elitanı heç bir komandanın tərk etməməsinin tərəfdarıdı. Baxın, biri də “idman prinsipi” ifadəsini dilinə gətirmir. İndi anladızmı, biz niyə Avropa və dünya çempionatlarının hər seçmə oyunundan sonra cəhənnəm əzabı yaşayırıq, niyə ictimaiyyət futbolla bu və ya başqa şəkildə bağlı olan hər kəsi – elə biz jurnalistləri də! – küçə söyüşləri ilə söyür. Çünki futbolu idman prinsiplərinə zərrəcə hörmət etməyən adamlara tapşırırıq. Və belə mütəxəssislərin-məşqçilərin fonunda ölkə futboluna rəhbərlik edənlərin – AFFA ilə PFL-in həm elitanın, həm də 1-ci divizionun tərkibi ilə bağlı istənilən eksperimentə əl atmaq haqqı var.
Doğrudan da, gerçək saxtakar kimdi: idman prinspinə tüpürməyi təklif edən baş məşqçilər, yoxsa AFFA və PFL? Mən cavabı bilirəm, buyurun, siz də deyin!
HUŞƏNG
Digər xəbərlər
