Misli premyer-liqasında 30-cu tura start verilib.

"Football-plus.az" xəbər verir ki, "Zirə" "Səbail"i qəbul edib - 3:1. Oyundan sonra qonaqların çalışdırıcısı Şahin Diniyevin mətbuat konfransı keçirilib. Sizi mütəxəssisin fikirləri ilə tanış edirik:

- Sıx qrafikdəsiz. Komanda fiziki cəhətdən çatdıra biləcək?
- Ağır qrafikdi. Həm də oyunların da mahiyyəti böyükdü. Qarşıda "Qəbələ" ilə 3 "Neftçi" ilə bir oyunumuz var. Bizim üçün ağırdı. Liderlərə qarşı oyunlarımız olacaq. Həm "Neftçi"nin, həm "Qəbələ"nin xallara ehtiyacı var. Onlar da qazanmaq istəyəcək. Üç gündən bir oynamaq çox çətindi. Tək bizə deyil, digər klublara da ağırdı. İngiltərədə belə üç gündən bir oynamaq çətinlik yaradır. Sıx qrafikdə dəyişikliklər vacib olacaq. Çalışacağıq, rotasiyalar hesabına nələrsə edək. Hər oyun bizim üçün vacibdi. Oyuna çıxıb, mübarizə aparmasan, futbol səni bağışlamayacaq.

- Hakimliklə bağlı nə deyə bilərsiz?
- Referilərdən danışmaq istəmirəm. Vacib oyunlarda bizə qarşı çıxıblar. Bu qədər səhvlər elə ancaq bir tərəfə olur. Faktlar var, qayda pozuntusu varsa, nə üçün vermirsən? Hakimlikdən narazı qaldım. Tək bu deyil, digər oyunlarda da belə olub. Bütün klublar hakimlərdən narazıdı.

- "Sabah" üzərində qələbədən sonra futbolçularda arxayınlıq yaranmışdı?
- Xeyr, bəzi şeylər var, onları mən daha yaxşı görürəm. Komanda istəkli idi, xarakter göstəririk. Meydanda normal futbol oynayırıq. Son dəqiqələrdə verilən boşluqlar normal idi, çünki komandam açılmışdı. "Zirə" də bu gün çox yaxşı futbol oynadı. Hər futbolçu çalışır ki, elitada qalaq.

- Samir Abdullayev oyuna girdikdən sonra sanki canlanma oldu. Onu daha tez buraxmaq olmazdı?
- Bilirsiz, məşqçi hansısa dəyişiklik edirsə, özü də beynində oyunu aparır. Bəlkə də razıyam, bəlkə də yox. 0:2-dən sonra qol imkanlarımız olsaydı, vura bilsəydik, bəlkə fərqli olardı.

- Kuboku qurban verib, elitada qalmaq düşüncədəsiz?
- Futbol xəyanəti sevmir. Bu oyun faktlarla oturuşmuş bir şeydi. Futbola xəyanət etsən, səni bağışlamaz. Mən heç vaxt bunu etmərəm. Meydana çıxırsızsa, gərək sona qədər mübarizə aparasan. Lazımsız oyun olmur. Hər iki cəbhədə vuruşacağıq. Allah qabağıma şans qoysa ki, ya kubok, ya elita, elitanı seçərəm.

- Elitada qalmaq uğrunda mübarizənin son tura qədər davam edəcəyin düşünürsüz?
- Proqnozların hamısı çaş-baş gedir. Kim gözləyərdi ki, "Sabah"ı udaq? Qazanılacaq hər xal qızıla bərabər olacaq. 6 xallıq oyunlarda uduzduğumuz görüşlər bizi çox geri atdı. "Şamaxı" ilə oyunda penalti epizodu düzgün deyildi və yaxud "Sumqayıt"la oyunda tərtəmiz qayda pozuntusu qeydə alınmadı. VAR heç buna yaxınlaşmadı. Amma bu gün hər şeyə baxırdı. Gileylənmək istəmirəm, özümüzdə də çox şey var. Sona qədər döyüşəcəyik.

- İddialar var ki, mövsümün sonunda kimsə elitanı tərk etməsin və əlavə iki komanda qatılsın yarışa. Siz hansının tərəfdarısız?
- Buna futbol mütəxəssisi kimi cavab verirəm: mən kiminsə çıxmasını istəmirəm. Bunun üçün səbəblər var. "Səbail"in akademiyası, normal sponsoru var. Hazırda maliyyə məsələsi çətindi, amma bizdə bu qaydasındadı. Komandanın arxasında duran sponsor var. Gəncə kimi bir şəhərdə futbolun olmaması günahdı. Şamaxıda bu gün gözəl komanda qurulub. Oyunçuları milli komandalarda çıxış edir. Bu klub niyə olmamalıdı? Sumqayıt kimi bir şəhər niyə çempionatda təmsil olunmamalıdı? İnanın, 4 komandadan biri aşağı liqaya düşsə, biz çox şey itirəcəyik. Bu komandalar autsayder deyil, digər rəqiblərlə başa-baş mübarizə apara bilirlər. Tək özümüzçün yox, digər komandalar üçün də deyirəm. 4 komandadan birinin düşməsi faciə olacaq. Sayı azaltmaq əvəzinə artırmaq lazımdı. Kiminsə elitadan çıxması bizə nə verəcək? Bütün komandalar premyer-liqada qalmalıdı. Hazırda "Səbail"də 180-ə yaxın adam işləyir, birdən-birə bunların üstündən xətt çəksək, divizondan sonra qaytara biləcəyik?