Dünən Türkiyə çempionatının 11-ci turunda ''Trabzonspor'' öz meydanında ''Sivasspor''u minimal hesabla məğlub etdi.

Slovakiyalı ulduz Marek Hamşik in 9-cu dəqiqədə vurduğu qol oyunda yeganə oldu. Bununla da son çempion superliqa çərçivəsində öz meydanındakı məğlubiyyətsiz seriyanı 30 oyuna yüksəltdi! Komanda Türkiyə çempionatında fanatları önündə sonuncu dəfə 2021-ci ilin martın 8-də, yəni 2020/21 mövsümünün 29-cu turunda ''Alanyaspor''a uduzub (1:3). Abdulla Avcının kollektivi həmin oyundan sonra evdə keçirdiyi 30 görüşdən 19 qələbə, 11 bərabərliklə ayrılıb.

Qeyd edək ki, bu göstəricidə turnirin rekordu məhz elə ''Trabzonspor''un özünə məxsusdu. Amma komanda bu rekordu yeniləmək üçün indiki göstəricisini ən azı 2 dəfə yaxşılaşdırmalıdı! Qaradənizlilər 1975/76-nın 9-cu turundan başlayaraq evdə nə az, nə çox – düz 90 oyunda uduzmamışdılar. Bu möhtəşəm seriya 1981/82-nin 16-cı turunda qırılmışdı. Bu, həm də müvafiq göstəricidə futbol tarixinin ən böyük 6-cı seriyasıdı.