“Maraqlı görüş oldu”
Misli premyer-liqasında 31-ci tura start verilib.
“Football-plus.az” xəbər verir ki, “Qarabağ” “Zirə”ni qəbul edib. Matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:
“Çox maraqlı oyun oldu. Drammatik matç keçdi. Azarkeşlər üçün əsl futbol var idi. Əlbəttə ki, qalib gəlmək istəyirdik. Çox yaxşı da hazırlaşmışdıq. "Zirə" sona qədər düzgün və yaxşı mübarizə apardı. 0:2-dən sonra 8 dəqiqədə oyunu əldən verdik. Lakin sonradan yenidən oyunu ələ aldıq. Xeyli sayda qol epizodları var idi. Maraqlı görüş oldu. Bəlkə də, hər iki komanda bir xala layiq idi. "Zirə"yə uğurlar arzulayıram. Qarşıdakı matçlara hazırlaşacağıq”.
- Sona qədər əvəzetməyə getmədiz. Bu, nə ilə bağlı idi?
- Oyunçular var idi. Sadəcə oyun pis getmirdi. Tam düşündüyümüz kimi hücumları qurub, oyuna nəzarət edirdik. Düzü, bir az ehtiyat etdim. Yassin Benzia, Filip Ozobiç, Redon Cica var idi ehtiyatda. Sadəcə onlar çoxdandı ki, oynamırdılar. Belə oyunda ritmi itirə bilərdik. Futbolçularımız meydanda 90 dəqiqə dözdülər. Hər oyunda rotasiya edirdik. Amma onların da 90 dəqiqə meydanda olması vacib gəlir. Ciddi səbəb yoxdur. Qarşıdakı matçlarda hansısa dəyişiklik ola bilər.
- Artıq iki oyundu ki, "Qarabağ" xal itirir. Bunun səbəbi nədi?
- Səbəbi yoxdu. Futbolun silinməyən qanunlarındandı. Bəzən komanda hardasa müəyyən müddət xal itkisinə məruz qalır. Rəqiblərimiz də çox ciddi hazırlaşırdılar. Komandamın oyunundan, futbolçuların yanaşmasından razı qaldım. Bu cür davam etsək, istəkli, dinamik oyuna üstünlük versək, qarşıdakı matçlarda daha yaxşı nəticələrimiz olacaq.
- Musa Qurbanlı ilə "Torino"nun maraqlandığı deyilir...
- Elə bir şey yoxdu. Xəbər olsa, bildirərdik.
- İcarədə olan futbolçularınız var. Onları yayda geri qaytarmaq ehtimalı var?
- Yaxından izləyirik, hər biri nəzarətdədilər. Bizə aid olan futbolçular onsuzda bizə aiddilər. Mayda baxılacaq bu məsələyə. Ondan sonra tam qərar veriləcək. Hər bir oyunçumuz nəzarətdədi.
Digər xəbərlər
