Azərbaycan kubokunda yarımfinal mərhələsinə start verilib.

"Football-plus.az" xəbər verir ki, "Qəbələ" "Səbail"i qəbul edib - 3:2. Oyundan sonra meydan sahiblərinin çalışdırıcısı Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:

- İdman prinsipləri qorunmadan Azərbaycan futbolu inkişaf edə bilər? Son vaxtlar bəzi məşqçilər deyir ki, premyer-liqadan birinci diviziona komanda düşməsin...
- İdman prinsipi həmişə öndə olmalıdı. Hətta "Qəbələ" axırıncı yerdədisə, yerinə hansısa komanda gəlməlidi. Həmin zonadan uzaq olduğumuza görə demirəm. İkinci məsələ də odu ki, mənim fikrimi bilmək istəyirsizsə, bizim çempionat üçün 10 komanda da azdı. Nə qədər çox olsa, maraq da artar. Premyer-liqaya yeni komandaların qoşulmasının tərəfdarıyam.

- Fasilədə futbolçulara nə dediz ki, ikinci yarıda rəqibə aman vermədiniz?
- 0:2 geridə olanda da, komanda meydanda istədiyimizi verirdi. Sadəcə ani epizodlarda qapısında qol görürdü. Yoxsa, komanda oyundan qopmamışdı. Öz oyunumuzu nümayiş etdirməyə çalışırdıq. Sevindirici hal odu ki, komanda toparlandı və layiqli qələbə qazandı.

- Rafael Utziqin performansını necə dəyərləndirirsiz?
- Rafael bundan daha yaxşı oynaya bilər. Potensiallı futbolçudu. O, bizimlə davam etsə, həm ona, həm də kluba daha yaxşı olar. Müqaviləsi yayda bitir. Ona təkliflərin olması da normaldı. Yaxşı futbolçunun yaxşı da təklifi hər zaman var. Biz də öz təklifimizi edəcəyik. Razı salsaq, onu görməkdən mənun olaram.

- Şansları necə dəyərləndirirsiz?
- Məğlub olsaydıq da, mənə görə şanslar bərabər qalacaqdı. İndi səfər və ev oyunlarının qolları da önəm daşımır. Qarşıdakı "Sumqayıt"la oyunu düşünürük. Daha sonra komandanı kubok görüşünə hazırlayacağıq.