Misli premyer-liqasında 29-cu tura start verilib.

"Football-plus.az" xəbər verir ki, "Qəbələ" "Zirə"ni qəbul edib - 2:1. Matçdan sonra meydan sahiblərinin çalışdırıcısı Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:

- İki oyundu ki, heyətdə rotasiyalar edirsiz. Bu, nə ilə bağlıdı?
- Çempionat ərzində rotasiyalar edirik. Məşqlərdə kimin durumu yaxşı olursa, onlara şans veririk. Muraddan da, Ürfandan da oyun planında razıyıq. Onlar da şans düşən kimi komandanın oyununa güc qatırlar.

- Artıq şəxsi oyunlarda "Zirə"ni üstələdiz. Bu, sizə nə dərəcədə avantaj verir?
- Ümumi götürəndə hələ heç bir avantaj yoxdu. Qarşıda çoxlu oyunlar var. Ona görə də həmin matçlara hazırlaşmaq lazımdı. Sırf bu oyunun eyforiyası ilə yaşamağa ehtiyac yoxdu. Dərk edirik ki, çempionatda 4-cü olub avrokuboklara getməmək də olar. Həm kuboka, həm də çempionata tam şəkildə köklənəcəyik.

- Qarşıda sıx qrafik olacaq. Komandanız buna hazırdı?
- Həm psixoloji, həm də funksional olaraq komandam möhkəmdi. Düşünürəm ki, sıxıntı yaşamamalıyıq.

- "Sabah" matçdan sonra yəqin ki, Səlahət Ağayevdən narazı qalmısız. İmkan olsaydı, bu gün qapıda rotasiya edərdiz?
- Mən səhvə görə kimisə ehtiyata atmıram. Səlahət inandığım futbolçudu. Hər futbolçu səhv edir. Keçən oyunda Səlahətin səhvlərinə görə qollar buraxdıq. Amma futbol səhvlər oyunudu. Futbolçularıma inanıram. Həmişə onlara dəstək olacam ki, eniş yaşamasınlar.

- Mövsümün sonuna kimi 4-cü yeri saxlamaq üçün nə lazımdı?
- Komandanın məşqlərinə baxıb ümidlənirəm. Futbolçular həqiqətən də istəklidilər. Mən də, onlar da bu iddiadan əl çəkməyəcəklər. Ola bilər ki, sonda istədiyimiz yerə çatmayaq. Amma komanda olaraq 4-cü yeri özümüz üçün hədəf etmişik.