"Təbii örtükdən, süni örtüklü stadiona keçəndə təsirsiz ötüşmür" - Elmar Baxşıyev
Misli premyer-liqasında 8-ci tura start verilib.
İlk oyun günündə "Səbail" "Qəbələ"yə uduzub - 1:2. Matçdan sonra əyalət təmsilçisinin baş məşqçisi Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:
"Oyunun ağır keçəcəyini bilirdik. "Səbail" yaxşı komandadı, heyətində keyfiyyətli futbolçular var. Həm təbii meydançada məşq edirik, həm də oynayırıq. Təbii örtükdən, süni örtüklü stadiona keçəndə təsirsiz ötüşmür. Ümumi oyunu dəyərləndirəndə komanda meydanda görmək istədiklərimi etdi. Düşünülmüş hücumlarımız var idi. Daim bunun üzərində işləyirik. Komandamı təbrik edirəm. İnanıram ki, qarşıdakı matçlarda daha da məzmunlu oyun nümayiş etdirəcəyik".
- Say üstünlüyü komandanı arxayınlaşdırdı sanki. Qapınızda qol görməyi bununla əlaqələndirmək olar?
- Xeyr, arxayınlıq olmadı. Hesab da bizi öndə oynamağa məcbur edirdi. Ona görə də daha çox qüvvə ilə hücuma atılırdıq. Bunun nəticəsində rəqib bizi əks-hücumlarda yaxalayırdı. Bu, normaldı. Komanda düzgün reaksiya verib qələbə qazandı.
- Ülvi İsgəndərovun oyununu ötən mövsümlə müqayisədə necə dəyərləndirirsiz?
- Statistika ilə götürməzdim. Ülvi komandanın ən önəmli futbolçularından biridi. Bizim komandada əsas və ya ehtiyat oyunçu anlayışı yoxdu. Bu gün Ülviyə şans düşdü, komandaya qələbə qazandırdı. Sabah başqası olacaq. Kollektivdə hamı öz maksimumunu verməyə çalışmalıdı.
- Sanki Rafael Utziq fərdi oyuna üstünlük verir. Siz necə düşünürsüz?
- Rafael hücumçudu. Hücumçu fərdi oynamağa üstünlük verməlidi. Heç kim hücumçuya deyə bilməz ki, driblinq etmə. Mən ondan istədiyimi ala bilirəm. Qarşıdakı turlarda daha yaxşı, daha özünə güvənən Rafael görəcəyik.
Digər xəbərlər
