Artıq “Barselona” ilə “Real”ın çempionluq uğrunda mübarizəsinə hansısa komandanın müdaxilə etməsi real görünmür.

"Football-plus.az" xəbər verir ki, ÇL-ə qalan iki vəsiqə uğrunda intriqa da sona qədər yaşayacaq. İlk “4-lük”də yer almağa iddialı “Real Sosyedad”, “Betis” və “Vilyarreal” müntəzəm xal itirir. Elitada qalmaq uğrunda mübarizəyə gəlincə, “Elçe” taleyi ilə barışıb, aralarında “Sevilya” ilə “Valensiya” da olmaqla bir neçə komanda təhlükəli zonadadı.

“Atletik” üzərindəki səfər qələbəsi “Barsa”ya çətin, çox çətin başa gəldi. İlk yarı gərgin mübarizə şəraitində keçsə də, qol vəziyyətləri sarıdan kasad idi. Hər halda, kataloniyalılar hissənin sonunda fərqlənə bildi. Busketsin ötürməsini Rafinya boşa vermədi. “Barsa” 2-ci hissənin müəyyən bölümündə oyunun axarına nəzarət etsə də, tədricən bu fikrə düşdü ki, minimal üstünlüyü qorumağa çalışmaq daha yaxşı yoldu. Axı komanda cari mövsümdə dəfələrlə bunu bacarıb. Bu taktikanı seçən kataloniyalılar həm də rəqibi əks-hücumda “tutmaq” istəyirdilər. Bununla belə, sonra lider öz qapısına doğru sıxılmalı oldu. Hətta 87-ci dəqiqədə basklar Ter Ştegenin qapısına yol tapdılar. Sadəcə, VAR vəziyyətə müdaxilə edərək İnyaki Uilyamsın qolundan bir qədər əvvəl Munyainin De Yonqla mübarizədə əllə oynadığını göstərdi ki, bu epizod dərhal İspaniyada geniş müzakirə doğurdu. “Barsa” bu qələbə sayəsində “Real”la xal fərqini 9-da saxladı.

Madridlilər hesabat turunda əzmkar qələbə qazandı. “Espanyol”un gözəl əks-hücum sonunda vurduğu erkən qol oyunun sonrakı axarına təsir etdi. Qonaqlar qoldan sonra tam müdafiəyə qapandı ki, bu da bəhrə vermədi. Rəqibi “mühasirəyə almaq” və təhlükəli vəziyyətləri sıralamaq üçün “Real”a o qədər də çox vaxt lazım olmadı. Artıq hissənin ortalarında hesab bərabərləşdi. Komandanın ən parlaq futbolçularından biri Vinisius keçidini uzaq küncə zərbə ilə bitirdi. “Real” tempi aşağı salmadı, əksinə, təzyiqi bir qədər də gücləndirdi. Fasiləyə yaxın Militao meydan sahiblərini irəli çıxardı. Bundan sonra “Real”ın qələbəsinə şübhə edənlərin sayı azaldı. Madridlilər 2-ci hissədə fərqi artırmağa borclu idi. Ancaq onlar bunu etmədi və “Espanyol” sonda hesabı bərabərləşdirmək ümidi ilə irəli atıldı. Belədə Ançelottinin komandası 3-cü qolu da vurdu.

Bir müddət əvvələ qədər ÇL-ə vəsiqəyə yetərincə yaxın görünən “Real Sosyedad” artıq uğursuzluq zolağındadı. San-Sebastyan klubu ardıcıl 4-cü oyunda qələbəyə həsrət qaldı. Baxmayaraq ki, artıq 3-cü dəqiqədə Fernandes qonaqları irəli çıxardı. Onlar fasiləyə qədər daha iki qol vura bilərdi. “Malyorka” rəqibin “dişsizliyini” görüb həvəsləndi və Li Kan İn 2-ci hissə başlayan kimi hesabı bərabərləşdirdi. Qarşılıqlı hücumlar şəraitində davam edən oyunda başqa qol olmadı

“Vilyarreal” – “Betis” oyunu “mərkəzi” təyini ilə ifadə oluna bilərdi. Axı hər iki komanda ÇL-ə vəsiqəyə iddialıdı. “Sarı sualtı qayıq” yüzilliyini qələbə ilə qeyd edə bilmədi. Hesabı 38-ci dəqiqədə Reynanın kobud səhvindən yararlanan İqlesias açdı. “Yubilyar” 2-ci hissənin əvvəlində bu qolun əvəzini çıxa bldi. Terratsın asmasını Pino tamamladı. Səfər 1:1-i “Vilyarreal”dan daha çox “Betis”ə sərf etdi.
Turun qalan oyunları ilə bağlı da maraqlı məqamlar var. “Kadis” – “Xetafe” oyununda qonaqlardan Enes Ünal bərabərlik qolunu 90+16-cı (!) dəqiqədə vurdu. Halbuki “Kadis” qələbə təqdirində üç pillə irəliləyəcəkdi. “Elçe” üçün cari mövsüm artıq bitib. Bu üzdən “Valyadolid”in qapısına 90+6-cı dəqiqədə vurulan bərabərlik qolu uzağı azarkeşlərin könlünü oxşaya bilər, hansısa turnir hədəflərindən söhbət getmir.

Turdakı yeganə böyükhesablı qələbə “Selta”nın hesabındadı. Viqolular “Rayo Valyekano”nu darmadağın etdi. Bu nəticə çempionatdakı son 5 oyunda qələbəyə həsrət qalan “Rayo”nun avrokuboklar iddiasına zərbədi. Son 11 oyunda 2-ci qələbəsini “Osasuna” üzərində qazanan “Valensiya” hələ də təhlükəli zonadan uzaqlaşa bilmir. “Yarasalar”la müqayisədə “Sevilya” daha yaxşı durumdadı. Xorxa Sampolinin komandası cari mövsümdə ilk dəfə əzmkar qələbə qazandı. Lamelanın qələbə topu “Sevilya”nın turnir cədvəlində birdən-birə 4 pillə irəliləməsinə şərait yaratdı.

Faktlar
* Cari mövsümdə 19-cu qolunu vuran Vinisius “böyük beşlik” ölkələrində çıxış edən braziliyalılar arasında bu göstəricidə liderdi. O, PSJ-nin hücumçusu Neymarı (18) arxada qoydu.
* “Barselona” 9-cu dəfə 1:0 hesabıyla qələbə qazanmaqla klub rekordu müəyyənləşdirdi. Bu göstəricidə La Liqa rekordu 11 oyuna bərabərdi.
* “Barsa” 25 turdan sonra yalnız 8 qol buraxıb ki, bu da La Liqanın yeni rekordudu. Əvvəlki rekord “Atletiko” ilə “Deportivo”ya məxsus idi. Madrid klubu 1990/91, La-Korunya klubu isə 1993/94 mövsümündə 25 oyunda 10 qol buraxıb.***