AFFA İcraiyyə Komitəsinin son iclasında verilən qərara görə, növbəti mövsüm 1-ci divizionla əvəzedicilərin çempionatı ayrılacaq.

İlk informasiya belə oldu ki, aşağı dəstədə 10 klub çıxış edəcək. Lisenziya şərtlərinə uyğun gələn 4 kollektiv 1-ci divizionda çıxış etmək ixtiyarında olacaq. Bununla bağlı işlər görülməkdədi. Mayın ortalarında aşağı dəstənin yeni iştirakçılarının adları bəlli olacaq.

Ümumiyyətlə, 2023/24 mövsümündə 1-ci divizion çox maraqlı olacaq. İlk qərarda bildirildi ki, komandalara 300 min manat ayrılacaq. Redaksiyamıza bununla bağlı maraqlı informasiya daxil olub. Klublar və futbol ictimaiyyətinin bir qismi ayrılan vəsaitdən narazıdı. Onlar məbləğin az olduğunu düşünür. Bu səbəbdən də AFFA İcraiyyə Komitəsinin növbəti iclasında maliyyənin 300 yox, 500 min manat olacağı açıqlanacaq.

Divizionla bağlı başqa bir məqam da var. Yeni mövsümün iştirakçılarının adını son olaraq PFL təyin edəcək. Yəni bu qurum çempionatda iştirak etmək istəyən kollektivlərin stadionunda baxış keçirəcək. Arenanın tribunalarında, paltardəyişmə və duş otaqlarında, ot örtüyündə hansısa problem olacaqsa, həmin klub çempionata buraxılmayacaq. Ola bilər, 4 iştirakçıdan birinə güzəşt edilsin ki, mövsüm başlayandan sonra öz infrastrukturunu qaydaya salsın. Lakin PFL-in əsas şərti odu ki, həmin “futbol ili”ndə stadion tam hazır vəziyyətdə olsun.

Görəsən, iştirakçılar kimlər olacaq? Gördüyünüz kimi, PFL-in əsas tələbi arenanın vəziyyətinin yaxşı olmasıdı. Redaksiyamıza daxil olan məlumata görə, qurum artıq üç

klubun adını müəyyənləşdirib. Bunlar “Araz” (Saatlı), “Xəzər Lənkəran 42” və “Ağsu-06”dı. Dördüncü klubun adı hələ ki bəlli deyil. Çünki qurum digər kollektivlərlə infrastruktur məsələsiylə bağlı danışıq aparıb.

Nə üçün yuxarıda adını çəkdiyimiz kollektivlər ön plandadı?

“Araz”dan başlayaq. Bildiyiniz kimi, bu mövsüm “İmişli” diviziondakı ev oyunlarını Saatlıda keçirirdi. Burdakı stadion PFL-in standartlarına uyğundu. Lənkəran və Ağsuda da infrastruktur yaxşı vəziyyətdədi. Həm də bu klublara müəyyən qədər maliyyə dəstəyi də var. Məhz bu səbəbdən qurum həmin klubların xeyrinə seçim edib. Son iştirakçının isə Şimal bölgəsindən olacağı gözlənilir. Qubada yaxşı vəziyyətdə stadion var. Lakin hələ ki bu şəhərdə hazır klub yoxdu. Ola bilər ki, Region Liqasında çıxış edən “Şirvanovka” və ya “Qusar” bura köçmək şərti ilə diviziona buraxılsın. Bəs “Karvan”? Əldə etdiyimiz məlumata görə, yevlaxlıların adının oyun alqı-satğısında hallanması onların aşağı dəstədə iştirak ehtimalının üstündən xətt çəkib.

Divizionda son yenilik isə yayın və təqvimlə bağlı ediləcək. PFL qarşılaşmaların hamısını azarkeşlərə canlı təqdim etmək istəyir. Bu səbəbdən 1-ci divizionun da oyunlarını həftəsonu keçirmək niyyətindədi. Yayın hüququ ya yerli telekanallardan birinə veriləcək, ya da PFL bu məsələni də öz öhdəliyinə götürəcək.

Bir sözlə, yeni mövsümdə divizionda mübarizə son həddə çatacaq. Yeniliklərlə dolu çempionat izləmək bizim üçün də xoş olacaq. Xeyirlisi!

İLKİN SULTANLI