"Elitada sonuncu yeri tutan komandanın diviziona düşəcəyinin qətiləşməsi gecikmiş olsa da, doğru qərardı. Bununla həm idman prinsipi bərpa olundu,  həm də çempionatda gərginlik, mübarizlik və maraq artdı. Baxın, ötən mövsüm aşağı yerlərdə qərarlaşan komandalar arasında ciddi mübarizə getmirdi. Arxayın idilər ki, heç kim elitanı tərk etməyəcək. Lakin bu mövsüm ikinci "5-lik" komandaları arasında ölüm-dirim savaşı gedir. Hətta deyərdim ki, bu "5-lik" ilk "5-lik" komandalarıyla müqayisədə daha rəqabətlidi. Çempionatımızın sonuna qədər elitada qalmaq uğrunda mübarizənin şahidi olacağıq. Mən bir dəfə vurğulamışdım, yenə təkrar edirəm, 1-ci divizionla yanaşı, 2-ci divizion da yaradılmalıdı. Bununla da Misli premyer-liqası ilə 1-ci və 2-ci divizionlar uzlaşdırılmalıdı.

Region Liqasında da peşəkarlaşma aparılmalıdı. Həmin liqada 3 illik məcburi çıxışın aradan qaldırılması təqdirəlayiqdi. Lakin bu o anlama gəlməməlidi ki, əyləncə üçün klublar yaradılmalıdı. Region Liqasında çıxış edən komandalar yuxarı diviziona və elitaya can atmalı və düzgün strategiya ilə klub yaratmalıdılar. Düşünürəm ki, SSRİ dönəmində və 90-cı illərdə futbol ənənələriylə məşhur bölgələrin komandalarını yenidən dirçəltmək lazımdı. Hazırda həm 1-ci divizionda, həm də gələcəkdə yaradılacaq 2-ci divizionda ancaq peşəkarlaşma xətti cızan komandalar yer almalıdı. Yəni, stadionu, bazası, infrastrukturu və sponsoru olan klublar olmalıdı.

AFFA-nın divizion komandalarına 300 min manat ayırması da yaxşı haldı. Amma gərək klublar yalnız federasiyanın ayırdığı pulla kifayətlənməyib sponsor axtarışında olmalıdıl. Hər bir komanda tədricən AFFA-nın ayırdığı maliyyə yardımından uzaqlaşıb öz ayaqları üzərində durmağı bacarsa, futbolumuz daha yaxşı inkişaf edər".