Misli premyer-liqasında 29-cu tura yekun vurulub.

"Football-plus.az" xəbər verir ki, "Qarabağ" "Kəpəz"i qəbul edib - 3:1. Matçdan sonra qonaqların çalışdırıcısı Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:

- "Neftçi"yə qarşı oyunla bugünkü oyun arasında hansı fərq oldu?
- Ola bilər ki, penalti verilməsi sınma nöqtəsi oldu. Ona qədər komandamız əzmkarlıq göstərir, nəyəsə nail olmağa çalışırdı. "Qarabağ" dəyişiklik edəndə, meydana çıxan futbolçular oyunun axarını dəyişəcək gücə malikdilər. Artıq geridə qaldı. Təki "Qarabağ"a uduzub, öz rəqiblərimizi məğlub edək.

- Penalti epizodu haqda nə düşünürsüz?
- Təmiz penalti idi. Hakimə irad tutulası məqam deyildi. Belə oyunlarda çox diqqətli olmaq lazımdı. "Qarabağ" rəqibi səhv etməyə məcbur edən komandadı. Özləri də səhvləri heç vaxt bağışlamır. "Neftçi" ilə tam fərqli heyətlə çıxmışdıq. Mate Kvirkviya və Fərid Nəbiyevin üç sarı vərəqəsi olduğundan onları qorumağa çalışırdıq. "Neftçi" ilə matçda da Mate ehtiyatdaydı, komanda normal oynadı. "Qarabağ" liderdi, xal ehtiyatı çoxdu. Komanda elə səviyyədədi ki, istədiyi komanda ilə oyunda matçı dəyişəcək gücdədi. Penaltidən əvvəl daha diqqətli olsaydıq, bəlkə də oyun fərqli məcrada keçərdi.

- Milli komandaya baş məşqçi təyin olunacağınızla bağlı məlumatlar paylaşılır. Təklif olarsa, hansı cavabı verərsiz?
- Azərbaycan millisində işləmək şərəfdi. Ağır günlərində də millinin şərəfini qorumuşuq. İstəmişik ki, Azərbaycan futbolu dünyada tanınsın. O dövrə qayıtmayaq. Məşqçi kimi etimad göstərilsə, vətəndaş olaraq, çalışacam əlimdən gələni edim. Kim mənim adımı milli ilə hallandırır, sağolsun. Millidə son illərdə yerli mütəxəssis çalışmalıdı. Çünki "Qarabağ"dan başqa klublarımızın səviyyəsi yüksək deyil. Konfrans Liqasında da görünür ki, ikinci mərhələdə dayanırıq. Bir neçə komandamız avrokuboklarda uğurlu çıxış etsə, sonra millimizin uğursuz çıxışı olarsa, adlı-sanlı məşqçi gətirmək mümkündü. Amma bizim klublarımız hələ o səviyyəyə çatmayıb. Mənə də etimad göstərilərsə, şərəf olardı millidə işləmək.

- "Kəpəz" yeni mövsümdə də evdə Gəncə şəhər stadionunda oynayacaq?
- İstəyərdim ki, "Kəpəz" hər zaman Gəncədə oynasın. Azərbaycan futbolunun özəyi oradı. Azərbaycanda "Neftçi" və "Kəpəz" öz sözünü deməyənə qədər, milli komandamızdan uğur tələb etmək çətindi. Futbolumuzun beşiyi Gəncədi. Futbol sevgisini qaytarmalıyıq. İstəyərdim ki, Zaqataladan da komanda premyer-liqaya qayıtsın. Hər halda, Musa Qurbanlı Qurban Qurbanov qardaşlarının futbol məkanıdı. Mənim doğulduğum Şirvan şəhəri futbol məktəbi olub. Hamısında futbol olmasını istəyərdim. Növbəti turdakı oyunumuz ola bilsin ki, Gəncədə oynamayaq. Yəqin ki, Qəbələdə oynayacağıq. Niyə "Kəpəz" ev oyununu öz stadionu ola-ola başqa stadionda oynasın? Hər komanda öz doğma meydançasında daha inamlı oynayır. Çox istəyərdim ki, yeni sezondan "Kəpəz" öz doğma meydançasında oynasın. Baş məşqçi postunda mən olsam da, olmasam da.

- İlqar Nadiri bir müddət əvvəl açıqlama verərək bildirmişdi ki, sizinlə müqavilə müddətinin uzadılması komandanın premyer-liqada qalıb-qalmamasından asılı olacaq. Danışıqlar gedir?
- Danışıq olmayıb. Çünki premyer-liqada qalmağımız rəsmiləşməyib. Qarşıda üç vacib oyunumuz var. Bu oyunlardan maksimum nəticə əldə etməliyik ki, yerimizi qoruyaq. Hələ ki, danışıqlar yoxdu.

İSMAYIL XEYRULLAYEV