Misli remyer-liqasının 28-ci turunun "Kəpəz" - "Səbail" qarşılaşmasını izləyənlər arasında əvəzedicilərin baş məşqçisi Xaliq Mərdanov da vardı.

"Football-plus.az" olaraq təcrübəli mütəxəssislə oyun, premyer-liqanın axarı, rəhbərlik etdiyi "Kəpəz-2"nin çıxışı və yığmamızın AÇ-2024-ün seçmə mərhələsində rüsvayçı startıyla bağlı danışdıq.

- Xaliq müəllim, çempionatın axarıyla bağlı fikirləriniz maraqlıdı.
- Çempionat normal axarıyla gedir. Əsas mübarizə ikinci "5-lik" komandaları arasındadı. Sonuncu yeri tutmamaq uğrunda gərgin mübarizə yaşanır. "Sumqayıt"ın səfərdə "Turan Tovuz"u məğlub etməsi gərginliyi bir qədər də artırdı. Düşünürəm ki, belə vəziyyət çempionatın son turuna qədər davam edəcək.

- "Kəpəz" doğma meydanda "Səbail"i yenməklə təhlükəli zonadan bir qədər uzaqlaşdı. Sizcə, komanda uğurlu çıxışını davam etdirə biləcəkmi?
- Bu haqda indidən nəsə demək çətindi. Amma qarşıdakı oyunların gərgin və maraqlı keçəcəyi dəqiqdi.

- Sizin rəhbərlik etdiyiniz əvəzedici komandada vəziyyət necədi?
- Ümumi ab-hava yaxşıdı. Hazırlığımız da normaldı. Düzdü, 22-ci turun ev oyununda minimal hesabla məğlub olduq. Sonrakı turda isə səfərdə minimal hesabla qalib gəldik. Həm komanda şəklində hücumlar qurmaqda, həm də əks-hücumlara çıxmaqda effektli olmağa çalışırıq. "Səbail-2" ilə matçda da yaxşı çıxış etdik. Rəqib bir qədər üstünlüyü ələ alanda komanda şəklində müdafiə olunmaq və hesabı qoruyub saxlamağı da bacardıq. Bir qədər də inkişaf etməliyik.

- Qarşınıza hansısa pilləni tutmaq hədəfi yoxdu. Məqsədiniz əsas komanda üçün futbolçu yetişdirməkdi. Bu müddət ərzində neçə futbolçunu "Kəpəz"ə qazandırmısız?
- Doğru vurğuladız, məqsədimiz futbolçu yetişdirməkdi. Bu mövsüm əsas komandaya 5 futbolçu qazandırdıq. Çalışacağıq növbəti mövsüm ən azı bu qədər oyunçu yetişdirək.

- Gəncədə və yaxın rayonlarda istedadlı uşaqları üzə çıxarmaq üçün seleksiya işləri aparırsız?
- Hazırda çempionatın gərgin dönəmi olduğundan seleksiya xarakterli işlərlə məşğul deyilik

- Kamran İbrahimovun "Kəpəz"dən göndərilməsi gündəmdə olsa da, gənc qapıçı yola salınmadı və sizin sərəncamınıza verildi. "Neftçi"nin sabiq qolkiperindən razısız, yoxsa Müşfiq Nadirov hazırda "1 nömrə"di?
- Hər futbolçudan həm qapıçı, həm də insan kimi razıyam. Onlar məşqlərdə bütün gücləriylə çalışır. Sadəcə, limitə görə Müşfiqə bir qədər çox şans veririk. Kamran premyer-liqa təcrübəsi olan qolkiperdi. Ona qarşıdakı oyunlarda şans verəcəm.

- Kapitan Elvin Yunuszadənin sıradan çıxması qarşıdakı matçlarda sizə problem yaratmayacaq?
- Yaradacaq. İki stopperimiz var. Onların hər biri sıradan çıxıb. Əvvəlcə Nemət Musayev, sonra da Elvin zədələndi. Onların olmaması işimizi xeyli çətinləşdirib. Amma heyətdə eksperiment aparmaqla Ruslan Süleymanovla Mahir Həsənovu son müdafiəçi mövqeyində sınadıq. Hər ikisi özünü yaxşı tərəfdən göstərdi. Onların çıxışından məmnunam.

- Yığmanın sabiq üzvü kimi ölkənin əsas komandasının seçmə mərhələdə biabırçı startıyla bağlı nə deyə bilərsiz?
- Açığı, belə nəticə gözləmirdik. Əslində hər iki oyuna pis başlamadıq. Sadəcə, sonradan rəqiblər bizi üstələdi. Hazırda Avropa futbolu sürətə və ideal fiziki hazırlığa əsaslanır. Təəssüf ki, yığmamız həm fizikada, həm də sürətdə çatdıra bilmir. Böyük hesabla uduzmağımızdan narahatıq.

- Millinin müasir futbola uyğunlaşa bilməməsinin səbəbi nədi və çıxış yolu varmı?
- Səbəb çoxdu. Onları bir-bir açıqlasaq, çox vaxtımız gedər. Amma hər şeydən əvvəl premyer-liqanın səviyyəsini qaldırmalıyıq. Elitada daha çox komandanın iştirakı təmin olunmalıdı. Həmçinin yerli futbolçular legioner həyatı yaşamağa can atmalıdı. Nə qədər güclü çempionatlarda futbolçularımız oynasa, bir o qədər yaxşıdı. Düşünürəm ki, sadaladıqlarımı etsək, millimizdə də inkişaf olacaq.

- Çoxları deyir ki, yığmada “milliləşdirilən” oyunçular çoxdu və buna görə meydanda milli ruh nümayiş etdirmir, mübarizə aparmırlar. Siz də belə düşünürsüz?
- Mən belə deməzdim. İstər Avstriya, istərsə də İsveç ilə oyunda futbolçularımız ilk dəqiqələrdən çox istəkliydi. Qol vurmaq üçün çalışırdılar. İstər yerli, istərsə də “milliləşdirilən” oyunçular “diş göstərirdi”. Sadəcə, yuxarıda qeyd etdiyim kimi, təcrübədə, sürətdə və fiziki hazırlıqda rəqibə uduzduq. Ümid edək ki, bu iki oyunda aldığımız məğlubiyyətlər dərs olacaq, futbolçular bundan nəticə çıxaracaq.

ABDULLA İSMAYILOĞLU