"Kəpəz" - "Səbail" oyununu izləyənlər arasında meydan sahiblərinin idman direktoru Mehman Allahverdiyev də var idi.

Fürsətdən istifadə edib Gəncə futbolunun canlı əfsanəsiylə söhbətləşdik. Onun stadionun ot örtüyü, "sarı-göylər"in qələbəsi, yığmanın çıxışı və başqa mövzularla bağlı fikrini öyrəndik.

- Bu gün "Səbail" üzərində qələbə qazandız. Oyunla bağlı təəssüratınız maraqlıdı...
- Çox gərin matç keçdi. Hər iki komandaya 3 xal hava-su kimi lazım idi. Buna rəğmən, “Kəpəz” qələbəyə daha layiq idi. Sağ olsun futbolçularımız, meydanda yaxşı mübarizə aparmaqla bizə qələbə sevinci yaşatdılar.

- Stadionun qazonu bərbaddı. Belə şəraitdə oynamaq oyunçularda zədə riskini artırır...
- Stadionumuz vəziyyəti yaxşı deyil. Amma ot örtüyü bu qədər problemli deyildi. Görünür, bayram günlərində şaxtalı havaların olması qazonu daha da bərbad günə qoyub.

- Bununla bağlı ölçü götürüləcək?
- Çalışacağıq ki, əlimizdən gələni edək. Sevindici haldı ki, havalar istiləşir. Bu da işimizə kömək edəcək. Düşünürəm ki, ayın sonuna kimi qazonun vəziyyəti düzələcək.

- Sonuncu yeri tutacaq komanda elitanı tərk edəcək. Bu, "Kəpəz" camiəsi üçün də siqnaldı?
- Əlbəttə, hər kəs anlayır ki, 4-cü dövrə olduqca gərgin keçəcək və hansı komanda daha istəkli, mübariz olacaqsa, az səhv edəcəksə, o da elitada qalacaq. "Səbail" üzərində qələbə bizi həm ümidləndirdi, həm də bir az rahat nəfəs almağımızla nəticələndi. Çünki hazırda sonuncu pillədə olan "Səbail"lə xal fərqimiz 7-yə çatdı. Təhlükəli zonadan qismən uzaqlaşdıq. Amma bu arxayınlıq və elitada yerimizi təmin etmək kimi qiymətləndirilməməlidi. Qarşıda hələ 8 ağır oyun var. Hər tur ağır keçəcək. "Turan Tovuz" - "Sumqayıt" oyununa baxın. Hər iki komanda meydanda döyüşdü. Bu bir daha sübut edir ki, çempionat, əsasən də ikinci "5-lik" komandaları arasında intriqa son tura qədər davam edəcək.

- Azərbaycan futbolunda xüsusi çəkisi olan fiqursuz. Sizcə, ölkənin əsas komandasında problem nədi ki, biabırçı məğlubiyyətlərlə üzləşir?
- Söz yox ki, Avstriya ilə İsveç güclü komandalardı. Amma böyükhesablı yenilgi gözləmirdik. Təbii ki, yığmada kimi oynadıb-oynatmamağa baş məşqçi qərar verir. Hazırda dünya futbolunda “milliləşdirmə” var. Hətta Ermənistan - Türkiyə oyununda da bədnam qonşularımızın heyətində qaradərili oyunçuya rast gəldik. Amma mənim qəti mövqeyim budu ki, millimizdə gəlmə futbolçulara yer verilməməlidi, yerli oyunçular oynamalıdı. Bunun üçün premyer-liqada komandaların sayını artırmalıyıq. Baxın, əvvəlki illərlə müqayisədə cari mövsümdə həm komandaların sayı artdı, həm də çempionat daha maraqlı və mübarizəli keçir. İndi düşünün, elitada 12, 14 və daha çox komanda olsaydı, daha güclü çempionat olmaqla yanaşı, yerli oyunçuların da inkişafı olacaqdı. Belə olanda da milli üçün futbolçu seçimi çoxalardı. Əminəm ki, yerli futbolçular millinin heyətində daha çox can qoyacaq. Mənə hələ də çatmır ki, Qara Qarayev kimi futbolçu niyə yığmaya çağrılmır?

- “Milliləşdirilən” oyunçuların əleyhinəsiz. Bəs əcnəbi baş məşqçilərin yığmanın “sükanı arxasına” gətirilməsinə son qoymalıyıqmı?
- Əcnəbi məşqçilərə üstünlük vermək ənənəsinə son qoyulmalıdı. Milli onların rəhbərliyi altında biabırçı nəticələr göstərirsə, bunu yerli məşqçilər də edə bilər. Hərçənd inanmıram ki, öz məşqçilərimiz belə nəticələr qazana. Özümüzün yetərincə gənc məşqçiimiz var ki, milliyə daha çox fayda verər.

- Sizcə, yığmanın “sükanı arxasında” hansı yerli mütəxəssislər yer almalıdı?
- Kifayət qədər məşqçi var. Amma ilk növbədə nəticə qazananlara yer verilməlidi. Elə götürək bizim komandanın baş məşqçisi Tərlan Əhmədovu. Ayxan Abbasov da milliyə layiqdi. Cavid Hüseynov məşqçiliyə yeni başlamağına rəğmən, azərbaycanlı oyunçuları yaxından tanıyır. Yəni o da millidə özünü doğruldar. Amma əsas namizəd Qurban Qurbanovla Rəşad Sadıqovdu. Arzum odu ki, millidə baş məşqçi Qurban Qurbanov, köməkçisi isə Rəşad Sadıqov olsun. Fikrimcə, bu duet yığmamızı inkişafa aparar.

- Yenidən Gəncə stadionuna qayıdaq. Arenanın tam sökülüb yenidən tikilməsi və ya başqa yerdə inşa edilməsiylə bağlı söz-söhbət gəzir. Stadionun taleyi necə olacaq?
- Hələ ki ortada dəqiq nəsə yoxdu. Mən də sizin qədər məlumatlıyam. Amma şəxsi mövqeyim budu ki, yeni stadion hazırkı yerində tikilsin. Çünki klubun akademiyası burda olacaq. Həmçinin bura hələ SSRİ dönəmindən futbol məkanımız olub. Hazırkı qəzalı stadionun tutumu 26 mindi. Böyük ehtimalla yeni stadion 20 minlik olacaq. Düşünürəm ki, Gəncə stadionu yalnız "Kəpəz"in istifadəsində olmamalıdı. Baxın, Gürcüstan seçmə mərhələdəki son oyunlarını Batumidə keçirdi. Halbuki Gürcüstanın nə ikinci, nə üçüncü, nə də dördüncü şəhəridi. Amma Gəncə qədim tarixə malik diyar olmaqla yanaşı, ikinci böyük şəhərimizdi. Ona görə yeni stadionumuzda millinin oyunlarının keçirilməsi də yaxşı olar. Bundan başqa, U-21 və U-19 yığmalarının matçlarının keçirilməsi də məqsədəuyğundu.

ABDULLA İSMAYILOĞLU