Ötən həftəsonu “Formula-1” üzrə dünya çempionatında 3-cü mərhələ keçirildi.

Növbəti dəfə “Red Bull” pilotunun – bu dəfə Maks Ferstappenin – qalib gəldiyi yarışın texniki nəticələrinə toxunmamış başqa əyləncəli məqamları xatırladaq. Səudiyyə Ərəbistanında finişə birinci çatan Serxio Peres Melburnda təsnifat mərhələsində büdrədi və ertəsi çox çalışsa da, 5-ci yerdən yuxarı qalxa bilmədi.

“Ferrari”nin pilotu Şarl Lekler üç dəfə qırmızı bayraqla dayandırılan yarışın elə ilk dövrəsində mübarizədən çəkildi. Onun maşını döngələrin birində Lens Strollun maşını ilə toqquşdu və trassdan kənara çıxdı. Maraqlıdı ki, Lekler ilk üç yarışın ikisində bu aqibətlə üzləşib. “Mersedes”in pilotu Corc Rassell isə 18-ci dövrədə mübarizəni dayandırmalı oldu. Maşınının arxa hissəsində tüstülənmə müşahidə olunduğundan, britaniyalı pilotun başqa çarəsi yox idi.

“Alpin”in fransalı pilotları Esteban Okonla Pyer Qaslinin münasibətlərindəki soyuqluq hər kəsə bəllidi. Melburn yarışında finişə iki dövrə qalmış bu iki pilotun maşını toqquşdu. Təbii ki, belədə xalsız qaldılar. Loqan Sarcentlə Nik de Vris də toqquşma üzündən mübarizəni yarımçıq dayandırdı. Kevin Maqnussenlə Aleksandr Albon da vaxtından əvvəl mübarizədən çəkildi. Bir sözlə, finişə cəmi 12 pilot çatdı. Maks Ferstappen fəxri kürsünün ən yüksək pilləsinə qalxdı. Onun əbədi rəqibi Lüis Hemilton 2-ci, Fernando Alonso isə 3-cü oldu.

Dünya çempionatı üçhəftəlik fasilədən sonra Bakı mərhələsi ilə davam edəcək. Azərbaycan paytaxtında isə yarış həmişə macəralı keçir.