Avqustun 9-da “Qarabağ”ı qəbul edəcək “Ferentsvaroş” bu oyun ərəfəsində sərt cəza ilə üzləşib. UEFA ÇL-in 2-ci təsnifat mərhələsində Slovakiya “Slovan”ı ilə oyunlarda fanatlarının davranışına görə Macarıstan çempionunu ümumilikdə 79 min avro cərimələyib.
"Football-plus.az" xəbər verir ki, azarkeşlərinin iqrçi çıxışlarına görə “Ferentsvaroş” 15 min avro ödəyəcək, 22 min yerlik “Qroupama” stadionunun bir hissəsi də “Qarabağ”la görüşdə azarkeşlərin üzünə bağlı olacaq. “Qismən qapanma” o deməkdi ki, Budapeştdəki stadionun “B” tribunasında ən azı 1000 yer boş qalmalıdı.
“Ferentsvaroş” “Qarabağ”la cavab görüşündə stadionda #NoToRacism yazılan banner də asmalıdı. Bundan başqa, UEFA Macarıstan klubuna avrokuboklardakı növbəti səfər oyununda azarkeşlərinə bilet satmağı qadağan edib. Ümumiyyətlə, növbəti iki il səfər oyunlarında “Ferentsvaroş” azarkeşləri üçün sınaq dövrü sayılacaq.
Məşəllərdən istifadəyə, meydana yad əşyalar atıldığına, təhqiramiz xarakterli təxribatçı çağırışlara və dəyən ziyana görə “Ferentsvaroş” daha 50 min avro ödəyəcək. Macarlar qarşıdakı bir ay ərzində Slovakiyada stadionda sındırılan 20 oturacağa görə “Slovan”a dəyən zərəri də qarşılamalıdı. Nəhayət, Macarıstan çempionu stadionda ümumi keçidlərin bağlanmasına görə də 14 min avro ödəyəcək.