Türkiyədə ilk mövsümünü keçirməsinə və zədə üzündən o qədər də çox oynamamasına baxmayaraq, indidən “Qalatasaray” fanatlarının sevimlisinə çevrilən Mauro İkardi sabiq həyat yoldaşı Vanda Naraya qarşı belə desək, “cavab atəşi açmağa” başlayıb.

Bilindiyi kimi, futbol dünyasının ən populyar cütlərindən olan Mauro ilə Vanda bir müddət öncə rəsmi şəkildə boşanmışdı. Argentinalı forvardın bütün cəhdlərinə baxmayaraq, Nara onu çoxsaylı xəyanətlərdə günahlandıraraq barışmaq istəməmişdi. Şəxsi həyatında yaşadığı bu problemlər fonunda İkardinin “Qalatasaray” karyerası hələ ki, uğurlu şəkildə irəliləyir. 29 yaşlı futbolçu superliqada cəmi 9 oyunda meydana çıxsa da, 6 qol, 4 məhsuldar ötürməlik performans sərgiləyib. Özü də bu qolların üçünü derbilərdə - “Beşiktaş”la “Fənərbaxça”ya vurub. Bu arada İtaliya mətbuatının yazdığına inansaq, İkardi Vandadan qisas almağa başlayıb və əvvəlcə təyyarəsini geri alıb. Həmin şəxsi təyyarə Mauroya aid olsa da, ondan Vanda ilə övladları istifadə edirdi. Məşhur futbolçunun ikinci addımı kredit kartlarını bloklamaq olub. İkardiyə məxsus bütün kartlar Vandada idi və sarışın gözəlçə onlardan istədiyi kimi istifadə edirdi. Özü də Vanda kartların bloklandığını bir supermarketdə alış-veriş etdiyi məqamda bilib. Deyilənə görə, həmin vaxt o, əsəbdən özünə yer tapa bilməyib. İkardinin növbəti addımı Vandadan olan uşaqları Françeska və İzabella ilə bağlıdı. Futbolçu valideynlik hüququnun ona verilməsini istəyir və bu məqsədlə məhkəməyə baş vurmağa hazırlaşır. Vəkillərinə bununla bağlı təlimat verən İkardi tam hüquqlu olmasa belə, ən azı valideynlik və uşaqlara nəzarət haqqının Vanda ilə bərabər səviyyədə olmasını istəyir.