"Bizə dəstək olan bütün fanatlara təşəkkür edirəm. Bu ağır vəziyyətdə bizi ruhlandırdılar. Rəqibə oynamağa imkan verməməyə çalışdıq. Onları təzyiqdə saxladıq. Üç xal bizim üçün çox vacib idi. Doqquz xallıq oyun oldu. Bu, bizə böyük motivasiyadı. Uğurlu çıxışın davamını gətirmək istəyirdik. Bu gün ən çox nəticə üçün çalışdıq. Futbolçularıma gözəl mübarizəyə görə təşəkkür edirəm".

"Football-plus.az" xəbər verir ki, bu sözləri "Kəpəz"in baş məşqçisi Tərlan Əhmədov premyer-liqanın 28-ci turunun "Səbail"lə (1:0) qələbəsindən sonra keçirilən mətbuat konfransında deyib. O, jurnalistlərin suallarını cavablandırıb.

- Ot örtüyünün durumu barədə fikriniz necədi?

- Əlbəttə ki, oyun keyfiyyəti bir az aşağı idi. Ancaq peşəkarlar üçün problem olmamalıdı. Bəli, meydançanın bu vəziyyətdə olması bizim üçün də üzücüdü. Ot örtüyü yaxşı olsa, oyunlarımız da daha keyfiyyətli alınar.

- Futbolçuların performansında yüksəliş hiss olunur...

- Ümumi olaraq bütün komanda yüksəlişdədi. Çalışırıq ki, bu vəziyyəti saxlayaq. Hələ ki, heç kimlə danışıq olmayıb. Premyer-liqada qalmağımız dəqiqləşəndən sonra futbolçularla danışıqlar başlanacaq. Büdcə də bəlli olmalıdır. Bu ilki əməkhaqqı ilə heç bir futbolçu yeni müqavilə imzalamaz. Sponsor, maliyyə məsələləri həll olunandan sonra bu barədə danışmaq olar.

- Bugünkü oyunda Orxan Sadıqlıya qapını etibar etdiniz. Bunun səbəbi nədi?

- Bizim üç qapıçımız da eyni səviyyədədi. Orxanın oyun praktikasının azalmasını istəmirəm. Buna görə də onu itirə bilmərik. Olar bilər ki, 2-3 turdan bir dəyişiklik etdik.

- Maaşların gecikdiyi deyilir. Bu, həqiqətdir?

- Bu barədə mətbuat xidməti açıqlama verib. Bəli, 2 ayın maaşını almamışıq. Gözləntimiz var. İdarə heyətinin rəhbəri futbolçularla danışır. Bu həftə məsələ öz həllini tapmalıdı.

- Növbəti mövsüm bu stadionda oynayacaqsız?

- Məndə belə məlumat yoxdu. Mənim karyeram çətin yerlərdə işləməklə keçib. Son üç gündə yeni salınmış təbii meydançada məşq etdik. Klub rəhbərliyi də çalışır. Biz qarşıdakı 8 turu fikirləşirik. Düşünürəm ki, stadion problemi qısa müddətdə həllini tapar.

- Maaş almayan komanda oyunlara necə fokuslanır?

- Çox çətindi. Bir dəfə futbolçular məşqə çıxmaqdan imtina etmişdi. Bunu yoluna qoyduq. Bizim işimiz insanlara sevinc bəxş etməkdi. Uşaqlara deyirəm ki, oynayarkən evdə sizi həyəcanla izləyən yaxınlarınızı fikirləşin. Onların sevinci milyona dəyər. Gecikmə ola bilər.

- Klubla müqavilənizi uzadacaqsız?

- Heç bir danışığımız olmayıb. Sırf çempionata köklənmişik. Müqavilədən danışmaq hələ tezdi. Bu gün qalib gələrək premyer-liqada qalmaq şansımızı artırdıq.

- Millinin oyunlarını necə şərh edərdiz?

- Üzücü məsələdi. Bizim zamanımızda şərait belə deyildi. 50 dollar maaş alırdıq. Bizim təlim-məşq toplanışımız olmurdu. Amma bu gün şərait fərqlidi. Məni üzən başqa məsələdi. Əcnəbi fubolçuların milliləşdirilməsi məni çox məyus edir. Akademiyalarımıza diqqət göstərməliyik. Artıq görürəm ki, mənim illər əvvəl dediyim fikirləri indi digər məşqçilər deyirlər. Akademiyalara kənardan kurator gətirmək lazım deyil. Həmin kuratorlara milyonlar xərclənir. O pulun yarısına başqa ölkələrlə əməkdaşlıq etmək olardı. Heç bir klubda savadlı məşqçilər yoxdu. Bu gün nə "Neftçi"də, nə "Qarabağ"da milli səviyyəsində oyunçu yetişmir. Millimiz legionerlərlə oyuna çıxıb məğlub olur. Elə onların əvəzinə öz gənclərimizə şans vermək yaxşıdı. Minimum 8 illik proqramla futbolumuzu inkişaf etdirə bilərik. Nazirliklə AFFA-nın əməkdaşlığı olmalıdı. Son 5 oyunda qalib gəldikdə hamımız sevinmişdik. Amma o yığmalarla indiki rəqiblərimizin səviyyəsi eyni deyil. Məşqçilər bunu fikirləşməliydilər. İki oyunda 9 top buraxmaq hamımız üçün üzücüdü.

- Komandanın lider futbolçuları maaşdan əlavə qonorar tələb etmir ki?

- Müqavilədə elə şey yoxdu. Mükafat motivasiya üçündü. Artıq ola bilməz. Ümumi məbləğdi. Əsas heyətdə oynayanlar yüz faiz mükafat alır. Ehtiyatdan girənlər 75 faiz, oynamayanlar isə 50 faiz. Futbol kollektiv oyundu. Elə məsələ dünya praktikasında yoxdu.

- Komanda birinci diviziona düşsə, qalacaqsız?

- AZAL-da olarkən 1,8 milyonluq büdcəni 155 minə endirdilər. Ancaq komandanı tərk etmədim. Bu gün də eyni cür davranaram.

- Futbolçularınızın mili komandaya dəvət olunmamasını necə şərh edərdiz?

- Açığı Fərid Nəbiyevin dəvət olunacağını gözləyirdim. O, "Kəpəz"in lider futbolçularından biridi. Bizdən aşağıda olan klublardan futbolçulara dəvət göndərilirsə, Fərid də çağırılmalı idi. O, özü də üzüntü yaşadı. Zədəli futbolçuları milliyə çağırıb ehtiyatda saxlamaqdansa, Fərid kimi uşaqları dəvət etmək daha yaxşıdı.

- Millidə əcnəbi məşqçinin işləməsinə münasibətiniz necədi?

- İllər əvvəl demişdim ki, klublar yüksək səviyyəyə qalxandan sonra milliyə əcnəbi məşqçi gətirmək olar. Öncə klubların səviyyəsini qaldırmalıyıq. Həmişə demişəm "Neftçi" öz əvvəlki səviyyəsinə qayıdıb söz sahibi olmadıqca millidən danışmaq mənasızdı.