Lionel Messinin adı əbədiləşdirilib.

"Football-plus.az" xəbər verir ki, bununla bağlı qərar onun vətənində verilib.

Argentina yığmasının hücumçusunun adı milli komandanın tikilməkdə olan yeni bazasına verilib. Argentina Futbol Assosiasiyasının prezidenti Klaudio Tapya bunu bazar ertəsi Eseysa şəhərində keçirilən tədbirdə bəyan edib. O, tikilməkdə olan bazanın 2022-ci ildə Qətərdə keçirilən dünya çempionatının qalibi olan komandanın kapitanının adını daşıyacağını bildirib: “Bu binada milli komandalarımızın yerləşməsi üçün 3 mərtəbə ayrılacaq. Tədris mərkəzi və yüksək səviyyəli tibb məntəqəsi olacaq. Burda həmçinin müxtəlif şərait, yaş və quru bərpa otaqları, 360 nəfərlik auditoriya olacaq. Bu kompleks bu gündən Lionel Andres Messinin adını daşıyır”.

Çərşənbə axşamı Messi üçün daha bir əlamətdar hadisə baş verib. KONMEBOL-un Argentina yığmasının dünya çempionatındakı böyük uğuruna həsr olunan tədbirində ona xüsusi mükafat təqdim olunub. Son dünya çempionu olan komandanın məşqçiləri ilə futbolçularına xüsusi medallar verilib. 35 yaşlı Messiyə dünyanın ən yaxşı oyunçusu kimi “Futbolun əsası” mükafatı verilib. Ulduz futbolçuya mükafatı KONMEBOL-un prezidenti Alexandro Dominges təqdim edib. Lionelə təxminən son iki ildə milli komanda ilə qazandığı üç turnirin – Amerika Kuboku, Finalissima və DÇ-2022-nin kubokunun surəti də hədiyyə edilib. O, həmçinin mərasimdə özünün şərəfinə qurulan heykəllə də tanış olub. Abidə təşkilatın muzeyində nümayiş olunacaq. Qeyd edək ki, indiyədək həmin muzeydə futbolun əfsanələri Pele ilə Dieqo Maradonanın heykəlləri mövcud idi. Messinin DÇ-2022-nin ən yaxşı futbolçusu seçildiyini də xatırladaq.

Yeri gəlmişkən, Argentina millisinin baş məşqçisi Lionel Skaloni Messinin DÇ-2026-da mümkün iştirakı ilə bağlı sualı cavablayıb. O, canlı əfsanənin növbəti mundialda da oynamasına çalışacağını bildirib: “Lioneldə hər şey qaydasındadı. O, oynamaq üçün burdadı. Əksini deməyənə qədər onu milli komandaya çağırmağa davam edəcəyik. Hətta qərarını dəyişəndə də onu inandırmağa çalışacağam”.

Qeyd edək ki, Messi əsas yığmada 2005-ci ildən çıxış edir. O, milli formada meydana çıxdığı 174 oyunda 102 qol vurub.