“Maradonanın, Messinin necə dünya çempionu olduğunu görməsi əla olardı” - Di Mariya
Argentina və dünya futbol ictimaiyyəti Dieqo Maradona ilə Lionel Messinin müqayisəsini davam etdirir. Anxel Di Mariya da jurnalistlərin bu mövzuda sualı ilə qarşılaşıb.
Football-plus.az xəbər verir ki, Qətərdə keçirilən dünya çempionatının qalibi olan Argentina yığmasının yarımmüdafiəçisi sualı belə cavablayıb:
“Dieqo Dieqodu və o, əbədi belə qalacaq. Və mən onun qarşısında şlyapamı çıxarıram. Çünki o, ən çətin anlarımda məni dəstəkləyib. Və hətta mən öləcəyim gün Dieqo mənim üçün hər şey demək olacaq. Ancaq mənim dövrüm üçün ən yaxşı futbolçu Messidi. Maradonanın Messinin necə dünya çempionu olduğunu görməsi əla olardı. Leo kuboku Dieqonun qarşısında başı üzərinə qaldırsaydı, çox möhtəşəm mənzərə yaranardı...”
Fevralın 14-də 35 yaşını tamamlayan Di Mariya 2026-cı ilə təyin olunan dünya çempionatında iştirak etmək niyyətində deyil. Maraqlıdı ki, o, Messinin üç ildən sonrakı mundialda çıxış edəcəyini düşünür:
“Artıq növbəti dünya çempionatı haqda heç nə arzulamıram. Qarşıdakı Amerika Kubokunda iştirak edəcəyimə inanıram. Həmin turnirdə çıxış etmək üçün əlimdən gələni edəcəyəm. Gələn il keçiriləcək yarışda heyətdə olmağı çox istərdim. Leo isə mütləq növbəti mundialda iştirak etməlidi. Çünki o Leodu. 7 dəfə “Qızıl top”un sahibi, 4 dəfə Çempionlar Liqasının qalibi olan oyunçudu. Tarixin ən yaxşı futbolçusudu. Mənə gəlincə, Amerika Kubokunda iştirak etmək üçün Avropada qalmalıyam. Əks halda Lionel Skaloni məni heyətə cəlb etməyəcək. Ciddi sınaqlara 100 faiz hazır olmaq lazımdı. Bu tələb bütün oyunçulara aiddi. Skaloni heç kimə güzəşt etmir”.
Digər xəbərlər
