Türkiyədə mövsüm başa çatandan sonra da istefalar davam edir.

Xatırladaq ki, son turun ardından 2 ildi ''Hatayspor''un başında olan Ömər Ərdoğan gözlənilmədən istefa vermişdi. Son günlərdə daha iki klub baş məşqçisi ilə vidalaşıb. Bunlardan biri ''Fatih Karagümrük''dü. İstanbul təmsilçisi Volkan Dəmirəllə yollarını ayırıb. Bu ayrılığı da sürpriz saymaq olar. Çünki Dəmirəl işinin öhdəsindən heç də pis gəlmirdi. O, mövsümün gedişində komandanın başına gətirilmiş və müstəqil məşqçi kimi ilk təcrübəsini yaşamışdı. ''Fatih Karagümrük'' bu mütəxəssisin başçılığı altında 24 rəsmi oyundan 12 qələbə, 5 heç-heçə, 7 məğlubiyyətlə ayrılaraq mövsümü 8-ci yerdə başa vurmuşdu. Türkiyə mətbuatının yazdığına inansaq, ayrılığın əsas səbəbi Dəmirəllə başqan Süleyman Hurma arasında yaşanan fikir ayrılığıdı. Təsadüfi deyil ki, 40 yaşlı Dəmirəl öz səhifəsində yazdığı vida məktubunda məhz başqanın tələbi ilə klubdan ayrıldığını xüsusi qeyd edib. ''Fatih Karagümrük''ün başına keçməyə əsas namizəd Şenol Can sayılır. Lisenziya problemini həll edən Can ''Fatih Karagümrük'' üçün yad sima deyil. Komanda 2020-ci ildə məhz bu mütəxəssisin başçılığı altında 1-ci liqada uğurlu çıxış edərək 36 illik fasilədən sonra elitaya vəsiqə qazanmışdı.
Dünən növbəti istefa xəbəri ''Kayserispor''dan gəldi. Daha doğrusu, mayın 31-də Hikmət Karamanın müqavilə müddəti başa çatdı. Rəhbərlik təcrübəli mütəxəssisə yeni müqavilə təklif etməyərək onunla vidalaşıb. 62 yaşlı mütəxəssis bu vəzifəyə ötən ilin avqustunda gəlmiş və birillik müqaviləyə imza atmışdı. Kayseri təmsilçisi 47 xal toplayaraq superliqada mövsümü 14-cü pillədə tamamlasa da, ölkə kubokunda mükəmməl çıxış etdi. Komanda yolüstü ''Fənərbaxça'', ''Beşiktaş'' və ''Trabzonspor''u yenərək tarixində ikinci dəfə bu turnirin finalına yüksəlsə də, həlledici oyunda ''Sivasspor''a boyun əydi. Ümumilikdə ''Kayserispor'' Karamanın başçılığı altında keçirdiyi 44 rəsmi oyundan 18 qələbə, 11 bərabərlik, 15 məğlubiyyət ilə ayrıldı.