“Kayserispor”un yeni məşqçisi bəlli oldu
Türkiyə çempionatında mövsüm başa çatandan sonra üç komandanın baş məşqçisi ilə vidalaşdığını xəbər vermişdik.
"Football-plus.az"ın xəbərinə görə, ''Hatayspor'' Ömər Ərdoğan, ''Fatih Karagümrük'' Volkan Dəmirəl, ''Kayserispor'' isə Hikmət Karaman ilə yolları ayırmışdı. ''Fatih Karagümrük'' hələ ki Andrea Pirlo ilə, ''Hatayspor'' isə Sərdar Özbalta və uzun illər ''Qalatasaray''da Fatih Terimin köməkçisi kimi çalışmış Levənt Şahinlə danışıqlar aparır. Amma bu iki klubdan fərqli ''Kayserispor'' artıq qərarını verib. Kubokun son finalçısı olan bu kollektiv Ömər Ərdoğanla anlaşdığını açıqlayıb. Xatırladaq ki, 45 yaşlı mütəxəssis son iki mövsümdə ''Hatayspor''u çalışdırmışdı. Hataylılar onun başçılığı altında 2020/21-i 6-cı, geridə qoyduğumuz mövsümü isə 12-ci pillədə tamamlamışdı. Hazırda həyat yoldaşı Pelin Ərdoğanla birlikdə İtaliyada dincələn Ömər Ərdoğan türkiyəli həmkarlarımıza açıqlamasında ''Kayserispor''la anlaşdığını təsdiqləyərək bunları deyib: ''Bəli, artıq bütün məsələlərdə razılığa gəlmişik. İnşallah, hər iki tərəf üçün də xeyirli bir anlaşma olar. Köməkçilərimlə birlikdə ''Kayserispor''da çalışmaqdan böyük məmnunluq duyacam. Hazırda həyat yoldaşımla birlikdə İtaliyadayam. Bu həftəiçi Türkiyəyə qayıtdıqdan sonra ''Kayserispor''la rəsmi müqavilə imzalayacam''.
Digər xəbərlər
