23 turu arxada qalan Türkiyə çempionatında məşqçi istefalarının sayının yenidən artması diqqəti çəkir.

Son bir ayda “Qaziantep”də Erol Bulutu Ərdal Günəş, “Ankaragücü”ndə Ömər Ərdoğanı Sədat Ağçay və son olaraq “Alanyaspor”da Françesko Fariolini Ərsun Yanal əvəzləyib. Bununla da cari mövsümdə istefa verən məşqçilərin sayı 10-a çatıb. Bu mövsümün gedişində “Kasımpaşa” ilə “Ankaragücü” artıq 2 dəfə məşqçi dəyişib. “Hatayspor”, “İstanbulspor”, “Beşiktaş”, “Konyaspor”, “Qaziantep” və “Alanyaspor” isə hərəyə bir dəfə məqşçi dəyişikliyinə gedib. Yəni ümumilikdə 19 klubdan 8-də bu baxımdan dəyişiklik yaşanıb. Düzdü, əvvəlki illərlə müqayisədə vəziyyətin daha sabit olduğunu iddia etmək olar. Məsələn, 2021/22-də 38 tur ərzində ümimilkdə 24, 2020/21-də isə 42 tur ərzində 26 məşqçi dəyişikliyi baş vermişdi. Amma yenə də Türkiyə bu baxımdan Avropada, demək olar, hamını üstələyir. Cari “futbol ili”ndə Avropanın aparıcı milli çempionatlarında ən çox məşqçi dəyişikliyi superliqa və premyer-liqada baş tutub. İngiltərənin elitasında da Türkiyədəki kimi indiyə qədər 10 istefa reallaşıb.

Yeri gəlmişkən, bu mövsüm 2 dəfə məşqçi dəyişdirən klubların siyahısına həmyerlimiz Mahir Emrelinin yeni transfer olunduğu “Konyaspor” da qoşula bilər. Konya təmsilçisi yanvarın ortalarında İlhan Palutun əvəzinə gətirilən Aleksandar Stanoyeviçdən narazıdı. Bu da təəccüblü deyil. Axı komanda serbiyalı məşqçinin rəhbərliyi altında 4 superliqa matçının hamısında xala və qola həsrət qalıb. Üstəlik Türkiyə kubokunda da mübarizəni dayandırıb. Şayiələrə inansaq, rəhbərlik Sərgən Yalçınla görüşərək ona təklif irəli sürüb. Danışıqlar davam edir. Amma ortada hələ ki heç bir rəsmi açıqlama yoxdu. 2020/21-də “Beşiktaş”ın başında tarix yazaraq həm çempionluğu, həm də ölkə kubokunu qazanan Sərgən növbəti mövsümdə istefa verməli olmuşdu. O, 15 aya yaxındı işsizdi. Yalçın daha öncə 2017/18-in ikinci dövrəsində qısa müddət, daha dəqiq desək, 10 oyunda konyalıları çalışdırmışdı. Komanda bu 10 görüşdən 4 qələbə, 3 heç-heçə, 3 məğlubiyyət ilə ayrılmışdı.