Milliyətcə türk olub futbol tarixinə damğa vuran oyunçuların sayı elə də çox deyil. Onlardan biri - Məsut Özil futbolla birdəfəlik vidalaşmaq qərarına gəldi.

"Football-plus.az" xəbər verir ki, yaxın keçmişin populyar simalarından olan və yaşıl meydanlarda xarüqələr yaradan Özil dünən karyerasını başa vurduğunu rəsmən açıqladı.

34 yaşlı yarımmüdafiəçi sosial şəbəkədəki vida paylaşımında son zamanlar tez-tez zədələnməsinin bu qərarda böyük rol oynadığını qeyd etdi. Məsut karyerası boyu şərəfini qoruduğu bütün klublara, başçılığı altında oynadığı məşqçilərə, birlikdə top qovduğu futbolçulara, eləcə də ona dəstək verənlərə təşəkkürünü bildirərək bundan sonra vaxtının çoxunu ailəsinə - həyat yoldaşı və iki qızına həsr edəcəyini vurğuladı.

Qeyd edək, ki, 1988-ci il təvəllüdlü Özil Almaniyanın Helzenkirhen şəhərində doğulub və ''Şalke-04''ün yetirməsidi. Bir mövsüm burda və 2 mövsüm ''Verder''də keçirdikdən sonra Özil 2010-da ''Real''a transfer olunmaqla karyerasında yeni dönəmə qədəm qoydu. O, 3 mövsüm ''Real''da və daha sonra uzun illər ''Arsenal''da sərgilədiyi futbolla dünyanın ən yaxşılarından birinə çevrildi. Bu 2 klubda ümumilikdə 5 titul qazandı.

Almaniyaya üstünlük verən Özilin yığma karyerası da çox uğurlu alındı. O, 2014-də dünya çempionu olan bundestimin ən önəmli oyunçularından biri idi və həmin turnirdə 7 qarşılaşmanın hamısında start heyətində meydana çıxmışdı. 9 il (2009-18) şərəfini qoruduğu Almaniya yığmasında 92 oyunda 23 qol, 40 məhsuldar ötürməlik performans sərgilədi. Məsutun karyerası faktiki olaraq 2019-dan bu yana ciddi eniş yaşamağa başladı.

''Arsenal''ın çalışdırıcısı Mikel Arteta ilə yola getməyən ulduz futbolçu 2021-in yanvarında böyük ümidlərlə uşaqlıqdan azarkeşlik etdiyi ''Fənərbaxça''ya transfer olundu. Amma burda da onun karyerası uğurlu alınmadı. ''Fənər''də ilyarım ərzində cəmi 37 oyuna çıxaraq 9 qol vuran Özil ötən yay ''İstanbul BŞ''yə keçdi. Burda isə zədələr və keçirdiyi əməliyyat ona mane oldu. Bütün mövsüm ərzində cəmi 7 rəsmi oyuna çıxa bilən Özil artıq butsları mismardan asmağın zamanı gəldiyini anladı. Fevralın əvvəllərində də onun karyerasını bitirməsi barədə şaiyələr yayılmışdı. Amma Məsut göründüyü kimi qərarını yalnız indi verdi.

O, siyasi məsələlərdə daim öz mövqeyi, inanılmaz oyun intellekti, eləcə də məhsuldar ötürmələri xatırlanacaq. Özil peşəkar karyerası boyu klub və yığmada ümumilikdə 645 rəsmi oyunda 114 qol, 222 məhsuldar ötürmə ilə fərqləndi.

ƏLİ