Boliviya çempionatının 6-cı turunda futbolda nadir görünən hallar yaşanıb. Qeyri-adi faktlar “Atletiko Palmaflor” – “Bluminq” oyununda (3:2) qeydə alınıb.

"Football-plus.az" xəbər verir ki, hakim Xulio Qutyerres matçın əsas vaxtına 41 (!) dəqiqə əlavə edib. Buna isə oyun zamanı bəzi epizodlara görə VAR yoxlaması üçün 20 dəqiqədən çox vaxtın getməsi səbəb olub. Həmçinin 4-cü hakimin əvvəlcədən elan etdiyi əlavə vaxt 10 dəqiqə nəzərdə tutulub. Əsas vaxt “Atletiko Palmaflor”un 2:1 hesablı üstünlüyü ilə sona çatıb. Matçın ən maraqlı və gərgin anları məhz əlavə vaxtda baş verib. 90+24-cü dəqiqədə Xose Luis Sinisterra “Bluminq”in bərabərlik qolunu vurmaqla hesabı 2:2 edib. Lakin 90+38-ci dəqiqədə Xonatan Kanyete dubl edərək yenidən “Atletiko Palmaflor”u önə çıxarıb. Vurğulanası faktlar bununla da bitməyib. Əsas vaxta əlavə olunan 21-ci və 28-ci dəqiqələrdə qonaqların iki oyunçusu qırmızı vərəqə ilə cəzalanıb.