PSJ rəhbərliyi uzun müddətdi Lionel Messini yola gətirməyə çalışır. Amma hələ ki istəyinə çata bilməyib.

"Football-plus.az" xəbər verir ki, dünya çempionu Paris klubu ilə müqaviləsinin müddətini yalnız bir neçə şərtlə uzada bilər.

“Marca” nəşrinin məlumatına görə, müqaviləsi bu ilin iyununda qüvvədən düşəcək 35 yaşlı hücumçu klubun yeni layihəsinə aydınlıq gətirməsini istəyir. Messi baş məşqçi Kristof Qaltyenin komandada qalıb-qalmayacağını, rəhbərliyin yayda heyəti gücləndirmək üçün hər hansı addım atıb-atmayacağını və “maliyyə feyr-pleyi” məhdudiyyətləri fonunda onunla müqavilənin yenilənib-yenilənməyəcəyini bilmək istəyir.

İspaniya nəşrinin məlumatında Messinin atası, eyni zamanda agenti olan Xorxenin bu günlərdə Səudiyyə Ərəbistanına səfər etdiyi bildirilib. Lakin onun səfərində məqsəd oğlunun yerli klublardan birinə potensial transferini müzakirə etmək olmayıb.