Hazırda İtaliyanın B seriyası təmsilçisi “Komo”nun şərəfini qoruyan “Barselona”nın və İspaniya yığmasının sabiq üzvü Sesk Fabreqas İspaniya mətbuatına diqqətçəkən açıqlamalar verib.

"Football-plus.az" xəbər verir ki, o, sabiq komanda yoldaşı Lionel Messinin “The Best” mükafatını qazanması, eləcə də “Barsa”nın 2016-18-ci illərdə İspaniya Hakimlər Komitəsinin vitse-prezidenti Xose Mariya Enrikes Neqreyranın şirkətinin hesabına 1,4 milyon avro köçürməsi barədə danışıb.

Sonradan məlum olmuşdu ki, kataloniyalılar 2001-dən bu yana Neqreyranın şirkətinə hətta 6,66 milyon avro ödəyibmişlər. 2011-14-ci illərdə “Barsa”da top qovan və bu müddət ərzində 7 titul qazanan 35 yaşlı Fabreqas bunları deyib:

“Mbappe çox istedadlıdı. Benzema isə ötən mövsüm ÇL tarixinin ən yaxşı performanslarından birini sərgilədi. Messi PSJ-də uğurlu mövsüm keçirir, üstəlik DÇ-nin qalibi olub. Bu, böyük əhəmiyyət kəsb edir. Bir futbolçu mundialdakı çıxışına görə mükafat qazanırsa, deməli, buna layiqdi. “Barselona”da oynadığım dönəmdə Neqreyra mövzusu barədə, ümumiyyətlə, heç nə eşitməmişdim. Şəxsi fikrim belədi ki, futbolçuların bu məsələlərə qarışmasına ehtiyac görmürəm. Çünki bunlar bizim anlayışımızdan və təsəvvürlərimizdən çox üstündü. Sizə çox şey danışa bilməyəcəm. Çünki bu məsələnin necə irəliləməsindən xəbərim yoxdu. Amma futbolçu kimi deyə bilərəm ki, bu, mənim üçün gözlənilməz oldu. Əlimə heç vaxt hakimliklə bağlı kağızlar, sənədlər keçməyib. Bir şeyi dəqiq deyə bilərəm ki, onlar (hakimləri nəzərdə tutur – red.) mənim çempionluğumu oğurlayıb “Atletiko”ya verdilər. Çünki qaydalar çərçivəsində vurulan qolu qeydə almadılar”.