Misli premyer-liqasında 26-cı tura bu gün keçiriləcək "Şamaxı" - "Neftçi" oyunu ilə yekun vurulacaq.

Bununla da məsafə bir addım da qısalacaq, klubları finiş xəttindən 10 tur ayıracaq. İlk "5-lik"də suallara böyük ölçüdə aydınlıq gəlibsə, aşağıda "sular durulmayıb". Nisbətən "Turan Tovuz" özünü rahat hiss edə bilər. Kubokda da mübarizəni davam etdirən Ayxan Abbasovun komandasının turnir cədvəlindəki mövqeyi ürəkaçandı. Qalan 4 komanda isə...

Əslində AFFA İcraiyyə Komətisinin iclasına kimi onlar da rahat idi. Çünki diviziondan əlavə 2 komandanın gətiriləcəyi haqda söz-söhbətlər davamlı şəkildə müzakirə mövzusu idi. Amma baş katib Sərxan Hacıyev son açıqlaması ilə buna ümid edənlərin arzusunu ürəyində qoydu. Bəli, mövsümün sonunda 1 komanda aşağı yuvarlanacaq. Arzular, planlar "suya düşəcək". Amma təbii ki, əsas idman prinsipinin qorunmasıdı ki, inşallah, mövsümün sonunda buna, nəhayət, əməl olunacaq.

İşin maraqlı tərəfi odu ki, elitadan diviziona "uçmağ"a ən real namizəd "Səbail"di. AFFA prezidenti Rövnəq Abdullayevin şəxsən yaratdığı klub. Oğlunun başını qatmaq üçün qol qoymuşdu bu layihəyə. Düzdü, kiçik Abdullayev kluba yaxın durmadı. Çünki adamın başını qatmaq üçün yetərincə məşğuliyyət sahəsi var idi. Hər şeyə rəğmən, "Səbail" yaşayır, klubu yaxşı-pis idarə edənlər var. Komandanın nəticələri isə...

Cari mövsümə Mahmud Qurbanovla başlayan "Səbail"i qarşıya qoyulan hədəflərə indi də Şahin Diniyev çatdırmalıdı. Amma komanda onun rəhbərliyi altında da varlıq göstərə bilmir. Bunu mən yox, heç vaxt yalan danışmayan quru rəqəmlər deyir. Üçüncü dövrədə 8 oyuna çıxan komandanın hesabında 2 qələbə, 1 heç-heçə və 5 (!) məğlubiyyət var. Etiraf edək ki, Rövnəq Abdullayevin "körpə"si üçün yetərincə zəif göstəricidi. Bəylər, 7 xalla "bala"nı elitada saxlamaq olmaz.

Düzdü, qarşıda hələ 10 oyun var. Amma gedişat məhz "Səbail"in diviziona yuvarlanacağından xəbər verir. Çünki ümidverici, "dişə vurulacaq" heç nə yoxdu. Sabit və normal oyun görmürük, məhsuldarlıq çox aşağıdı (son 8 oyunda 6 qol), müdafiə bərbaddı (son 8 oyunda 15 qol). ""Səbail" özündən bir pillə öndə olan "Şamaxı"dan 3, qalan əsas rəqiblərindən 4 xal geri qalır. O "Şamaxı"dan ki, heyətində bir legioner belə yoxdu. O "Şamaxı"dan ki, premyer-liqanın iddialılarına belə "diş göstərir". Yerli gənclər uzun illər Azərbaycan futbolunda kök salan, çoxlarının qalxanəvəzi istifadə etdiyi bəhanələri alt-üst etdi. Ortada "Şamaxı" adlı bir nümunə var və buna görə bu kluba təşəkkür etməyə dəyər.

Bu nümunəyə əsaslanaraq Rövnəq Abdullayevə bir məsləhətim olacaq. İşdi, "Səbail" diviziona yuvarlansa, komandanın adını və heyətini dəyişməklə infrastrukturu, azarkeş bazası olan bölgələrdən birinə köçürün. Yerli təcrübəli və gənc futbolçuların sintezindən hazırkı "Səbail"dən daha yaxşı komanda qurmaq olar. "Şamaxı" layihəsi özünü doğrultdusa, buna da cəhd etməyə dəyər. Əks halda "körpə"nin işi çox çətin olacaq.

KƏNAN HƏSƏNOV