Premyer-liqanın hər turundan sonra hakimliklə bağlı şikayətlər eşidirik.

“Ədalət təmsilçisi filan epizodda ədalətsiz qərar qəbul etdi, bizə qarşı haqsızlıq etdi, niyə VAR-a baxmadı” kimi ifadələr artıq mətbuat konfranslarında adi, şablon sözlər kimi qəbul olunur. Xüsusilə, qış fasiləsindən sonra bu cür şikayətlərin sayı çoxalıb. Bəli, “qara paltarlılar” səhv edirlər, bəzən hansısa komandanın haqqına girib onu xaldan və ya xallardan məhrum edirlər. Bunu etiraf etmək lazımdı. Ancaq hər uğursuzluğu, məğlubiyyəti, xal itkisini də hakimliklə əlaqələndirib cavabdeh şəxslərin sinəsini kənara çəkməyi doğru deyil. Məsələn, Murad Musayev “Turan Tovuz”la matçdan sonra komandasının məğlubiyyətində hakimliyin böyük rol oynadığını bildirdi. Rusiyalı mütəxəssis tarixi vərəqlələdi, gəldiyi gündən Kamal Umudlu ilə “ulduzunun” barışmadığını vurğuladı, ötən mövsüm avrokuboklara yollanmamasının əsas günahkarının Umudlu olduğunu söylədi. Ancaq bir həftə sonra Şamaxıdakı yenilgi göstərdi ki, problem hakimlikdə yox, “bayquşlar”ın özündədi. Komanda yaxaladığı qol epizodlarını boşa verirsə, müdafiədə axmaq səhvlərlə yadda qalırsa, bunda nə referi, nə də başqa birisi günahkardı. Məsuluyyət birbaşa baş məşqçinin özündədi.

Eyni sözləri dünən baş tutan “Səbail” – “Sumqayıt” matçı barədə də demək olar. “ASCO Arena”dakı qarşılaşmadan sonra meydan sahiblərinin çalışdırıcısı Şahin Diniyev hakimliklə bağlı narazılığını ifadə etdi, əvvəlki qarşılaşmalarda üzləşdikləri haqsızlıqları sadaladı. Bu azmış kimi, az qala VAR icad edənin var yoxunu yada saldı. Ancaq nədənsə, məğlubiyyətə görə baş məşqçi nə özünün, nə də futbolçularının məsuliyyət daşıdığını bildirdi. Sanki, 90 dəqiqə “Səbail”in normal hücum qurmamsının, rəqib qapısı önündə təhlükə yarada bilməməsinin günahı baş hakimdə idi. Futbolçu kobudluq edirsə, sürətli əks-hücumun qarşısını yolverilməz hərəkətlə kəsirsə hakim nə etməlidi? Başını sığallayıb “yaxşı vurdun, ancaq növbəti dəfə ayağını sındır” deməlidi... Qələbə qazanmaq istəyən kollektiv heç olmasa iki hissədə bir real qol şansı yarada bildimi? Birinci yarının əvvəlində İlkin Muradovun təxminən 30 metrdən “çərçivə” istiqamətində vurduğu zərbədən başqa “dənizçilər” heç nə ilə yadda qalmadılar. Əslində “Sumqayıt”da heç nə etmədi. Sadəcə, dünən futbol tanrısı “kimyaçılar”ın tərəfində idi. Əsl cavab verilməli, baş sındırmalı məsələ budu. Hakimlikdən şikayət edib, məğlubiyyətə “hakim filaş şey etdi, Var monitoru açılmadı, günəş şərqdən yox, qərbdən çıxdı, butsı futbolçunun ayağını sıxırdı” kimi bəhanələrlə don geyindirməklə sonuncu pillədən qurtulmaq mümkün deyil. Bəli, yenə etiraf edirəm ki, bu gün hakimlik istənilən səviyyədə deyil. Ancaq “Səbail”də qələbə üçün nəsə etdimi? Məşhur lətifədə deyildiyi kimi, sən heç olmasa lotoreya al, sonra bəxtindən şikayət et.

RƏŞAD