Türkiyə çempionatında zəlzələ üzündən yaranmış məcburi fasilə başa çatdı.

Şənbə günü 23-cü turdan təxirə salınan iki oyun keçirildi. Səfərdə “Girəsunspor”u üstələyən “Kayserispor” ardıcıl 3-cü qələbəsini qazandı. Günün digər matçında “Fənərbaxça” enişdə olan “Konyaspor”u qəbul etdi. Təbii ki, matçdan öncə və oyunun gedişində zəlzələdə dünyasını dəyişənlər və bu faciədən zərər görənlər unudulmadı. Jorje Jezuş cəzalı olduğundan komandanı meydana onun köməkçisi Joao de Deuş çıxarmışdı. Əvvəldən sona qədər rəqibindən üstün olan “Fənər” mövsümdəki növbəti parlaq qələbələrindən birini qazandı. Düzdü, qonaqlar 22-ci dəqiqədə Diufun qırmızı vərəqə almasıyla azlıqda qaldılar. Amma meydan sahibləri ona qədər artıq Valensiyanın penaltidən vurduğu qolla hesabı açmışdı. Maraqlıdı ki, bu komandaların ilk dövrədəki oyununda da məhz elə 22-ci dəqiqədə qırmızı vərəqə göstərilmişdi! Amma həmin vaxt meydandan qovulan Valensiya olmuş və “Fənər” rəqibinə minimal hesabla boyun əymişdi. Bu dəfə Valensiya qəhrəmana çevrilərək hələ fasiləyə qədər dublunu rəsmiləşdirdi. Çox çarəsiz təsir bağışlayan “Konyaspor” fasilədən sonra daha 2 top buraxaraq mövsümdəki ən böyükhesablı məğlubiyyətini yaşadı. “Fənərbaxça” lider “Qalatasaray”la xal fərqini 6-ya endirdi.

Aleksander Stanoyeviç isə deyəsən, Türkiyəyə antirekordları yeniləmək üçün gəlib. “Konyaspor” İlhan Palutun əvəzinə baş məşqçi postuna gətirilən bu mütəxəssisin başçılığı altında 4-cü superliqa oyunundan da məğlub ayrıldı (top fərqi – 0:8)! Belə durumda olan komandanı seçən Mahir Emrelini irəlidə nələrin gözlədiyi də maraqlı məqamdı.

Bazar günü daha iki görüş baş tutdu. “Adana Dəmirspor” aşkar autsayder “Ümraniyəspor”la səfər oyununda favorit statusunu doğrulda bilməyərək son anlarda qələbəni əldən verdi. 14-cü turdan təxirə salınan oyunda isə “Beşiktaş” “Antalyaspor”u qəbul etdi. Zəlzələ bölgəsində yaşayan uşaqların İstanbula gətirilərək futbolçularla birlikdə meydana çıxması fanatların alqışına səbəb oldu. Matça rəng qatan məqam isə zəlzələnin başlama saatına uyğun olaraq 4-cü dəqiqə 17-ci saniyədən etibarən yaşandı. Tribunaları dolduran 40 minə yaxın fanat əlindəki şərf, papaq, yumşaq oyuncaqları meydana tərəf atmağa başladı. Bu duyğusal görüntülər Avropa mətbuatında da böyük marağa səbəb oldu. Stadionun işçiləri ilə birlikdə futbolçular da oyuncaqların yığılmasına kömək etdi. Oyuna gəlincə, qonaqların qapıçısı Ataberk Dadakdəniz sürpriz performansı ilə matça damğa vurdu. Superliqada debüt (!) oyununa çıxan 23 yaşlı qapıçı 5 seyv etdi. Ən əsası o, əsas vaxta əlavə olunmuş dəqiqələrdə Cenk Tosunun penaltisini dəf etdi! “Beşiktaş”ın qələbəsiz seriyası 3 oyuna yüksəldi. Komanda bu 3 matçda cəmi 1 qol vurub. Maraqlıdı ki, 4,5 aylıq fasilədən sonra ilk dəfə start heyətində oynamağa hazırlaşan Gezzal isinmə hərəkətləri zamanı yenə zədələnərək 2 həftəliyə sıradan çıxdı. Əlcəzairli bu mövsüm zədə üzündən artıq 19 rəsmi oyunu buraxmalı olub.

Yeri gəlmişkən, onu da bildirək ki, srağagün “Qalatasaray”a qarşı hazırlıq matçında 2:4 hesabıyla uduzan “Alanyaspor”da baş məşqçi Françesko Farioli oyundan sonra futbolçularla vidalaşaraq istefa verib. 33 yaşlı italiyalı mütəxəssis 2021-in dekabrından komandanın başında idi. Alanyalılar onun dönəmində 47 rəsmi oyundan 21 qələbə, 10 heç-heçə, 16 məğlubiyyətlə ayrılıb. Fariolini Ərsun Yanal əvəz edib. Təcrübəli mütəxəssislə 2,5 illik müqavilə imzalanıb.

Faktlar
* “Fənərbaxça” bu mövsüm evdə keçirdiyi 12 superliqa matçının 6-da ən azı 4 top vurmağı bacarıb. Komanda bundan daha yaxşı (8) göstərciyə sonuncu dəfə 2000/01 mövsümündə - Mustafa Dənizlinin dönəmində nail olub.
* Valensiya bu mövsüm superliqada meydana çıxdığı 19 qarşılaşmada 22 qol vurub ki, bu da orta hesabla hər oyuna 1,15 qol deməkdi. Hətta “Mançester Siti”li Erlinq Holann da bu göstəricidə Valensiyadan az da olsa, geridədi. Norveçli forvard premyer-liqada 24 oyuna 27 top vurub ki, bu da hər oyuna 1,12 qol deməkdi.
* Valensiya bu mövsüm 7-ci dəfə bir oyunda ən azı 2 top vurdu. Avropanın milli çempionatlarında yenə də yalnız Holann eynilə bu cür göstərici ilə öyünə bilər.
* Valensiya bu mövsüm 3-cü dəfə ardıcıl 3 oyunluq qol seriyası yaxaladı və superliqada son 3 mövsümdə bunu bacaran ilk futbolçu oldu.
* Valensiyada “Fənərbaxça”da 99-cu rəsmi oyunda vurduğu qolların sayını 51-ə çatdırdı. O, Fernandaonu (104 oyuna 50 qol) geridə qoyaraq klub tarixinin ən məhsuldar oyunçuları siyahısında ilk “10-luğ”a daxil oldu.
* Valensiya “Fənərbaxça”nın tarixində 23 turdan sonra 22 qol həddinə çatan ilk futbolçudu! Əvvəlki rekord 1992/93-də 23 tura 21 qol vuran Tanju Çolaka məxsus idi.
* “Beşiktaş” Şenol Günəşin 2-ci dönəmində evdəki 5-ci superliqa matçında ilk dəfə xal itirdi.
* “Antalyaspor” superliqa çərçivəsində “Beşiktaş”a qarşı ardıcıl 5-ci səfər oyununda uduzmadı (2 qələbə, 3 heç-heçə) və turnirin tarixində “Fənərbaxça”, “Qalatasaray”, “Sivasspor”, “Trabzonspor”dan sonra belə seriya yaxalayan 5-ci klub oldu.
* Cenk Tosun superliqada ilk dəfə penaltini boşa verdi. Təcrübəli forvard buna qədər bu turnirdə yerinə yetirdiyi 12 penaltinin hamısını qola çevirmişdi.