Dünən ''Fənərbaxça'' növbəti yoxlama oyununu keçirdi.

"Football-plus.az" xəbər verir ki, İstanbul nəhəngi Sakaryada Acun Ilıcalının sahibi olduğu çempionşip təmsilçisi ''Hall Siti'' ilə qarşılaşdı. Oyuna maraq gözləniləndən də böyük oldu və matçı izləməyə 20 mindən çox azarkeş gəldi. Qarşılaşma bu ilin martında dünyasını dəyişmiş ''Acun Medya'' şirkətinin baş koordinatoru, uzun illər müxtəlif layihələrdə Ilıcalının sağ əli sayılan Alpay Kazanın xatirəsinə həsr olunmuşdu. Əslən sakaryalı olan Kazan xərçəng xəstəliyindən dünyasını dəyişmişdi. Acun Ilıcalı ilə ''Fənərbaxça'' başqanı Əli Koç oyunu birlikdə izlədi.

Matça gəlincə Jorje Jezuş bu heyəti meydana buraxmışdı: Altay Bayındır, Osayi-Samuel, Kim Min Çje, Salai, Fərdi Kadıoğlu, İsmayıl Yüksək, Krespo, İrfan Can Kahveci, Linkoln, Rossi, Valensiya. Qonaqlarda isə ''Fənər''in iki sabiq oyunçusu Ozan Tufan ilə Allahyar Səyyadmaneş də start heyətində idi. Matçboyu çox istəkli görünən və rəqibindən bir baş üstün olan ''sarı-lacivərdlilər'' uzun müddət hesabı aça bilmədilər. 43-cü dəqiqədə Valensiya dirəyi nişan aldısa, 63-cü dəqiqədə Bruma təkbətək şansı boşa verdi. Jezuş ikinci yarıda demək olar bütün oyunçuları əvəzlədi. Matçın son bölümündə meydana çıxanlar özlərini daha yaxşı tərəfdən göstərdilər və ''Fənər'' nəhayət ''şeytanın qıçını qırdı''. Bu sözlər xüsusilə Arda Gülərə aiddi. İstedadı ilə bütün Avropada adından söz etdirən 17 yaşlı yarımmüdafiəçi yenə diqqət çəkməyi bacardı. Arda 87-ci dəqiqədə qazanılan cərimə zərbəsini mükəmməl yerinə yetirdisə, bir dəqiqə sonra məhz onun və Berişanın qurduğu kombinasiya Sərdar Dursunun qolu ilə nəticələndi. Beləliklə, ''Fənərbaxça'' rəqibini 2 cavabsız qolla məğlub etdi. Diqqət çəkən məqam odu ki, komanda bu hazırlıq dönəmini əla nəticələrlə tamamladı. ''Fənər'' keçirdiyi 6 qarşılaşmadan 5 qələbə, 1 bərabərliklə ayrıldı. ''Dinamo'' ilə oyuna qədər hələ ki, hər hansı bir yoxlama oyunu nəzərdə tutulmayıb. Amma planda dəyişiklik də edilə bilər. ''Fənərbaxça''

Çempionlar Liqasının 2-ci təsnifat mərhələsi çərçivəsində kiyevlilərə qarşı ilk oyunu iyulun 20-də səfərdə, daha dəqiqə desək, Polşada keçirəcək.