“Sumqayıt” ikinci dövrədə səfərdə məğlub etdiyi “Kəpəz”i qonaq edirdi.

Qonaqlar oyuna fəal başladı və 7-ci dəqiqədə hesabı açdı. Ayzaya cərimə meydançasının həndəvərindən topu “6-lığ”a göndərdi. Aydının da buraxlan qolda səhvi var idi. Qola qədər isə elə təəssürat yaranmışdı ki, “kimyaçılar” sanki hələ meydanda yox, paltardəyişmə otağındadı. Erkən qol da onları ayıltmadı. Əvəzində “sarı-göylər” daha da ruhlanaraq rəngarəng hücumlar qururdu. Martins sağ, Mate sol cinahda “Sumqayıt”ın müdafiəçilərinə əsl başağrı olmuşdu. Ayzayanın isə “dirijorluğuna” söz ola bilməzdi. Nigeriyalı komandasının oyununu idarə edirdi, müdafiədən hücuma keçiddə əsas fiqur idi. Kantariya isə dağıdıcı kimi işini məharətlə görürdü. “Sumqayıt”da heç nə alınmırdı. İlk yarıda “kimyaçılar” ardıcıl üç ötürmə verməkdə çətinlik çəkirdi. Qonaqların ikinci qolu isə meydan sahiblərinin qapısıçısı adına rüsvayçılıq idi. Bədəlovun səhvindən sonra topa yiyələnən Martins Bayramovun irəli çıxdığını görüb, demək olar, meydanın mərkəzindən, təxminən 44 metrdən paraşüt zərbə ilə hesab arasında fərqi iki topa çatdırdı.

Fasilədən sonra “Sumqayıt” bir qədər özünə gəldi və ilk yarıdan fərqli hücumlar etməyə başladı. Ancaq bu da fərqlənmək üçün yetərli deyildi. Meydan sahiblərinin təzyiqi son dəqiqələrdə bəhrə verdi. 89-cü dəqiqədə Yusif tərs zərbə ilə avtoqol müəllifi oldu. Bu qol matçın yekun nəticəsini müəyyənləşdirdi. Səfərdən 3 xalla dönən “Kəpəz” həm ikinci dövrədəki məğlubiyyətin əvəzini çıxdı, həm də turnir cədvəlində vəziyyətini bir qədər yaxşılaşdırdı.

Gözdən qaçmadı
* Yığmanın baş məşqçisi Canni de Byazi və köməkçisi Arif Əsədov oyunu izləyənlər arasında idi.
* Matç başa çatandan sonra gəncəli azarkeşlər Yusif Nəbiyevlə Tural Axundovun ünvanına xoşagəlməz şüarlar səsləndirdi.
Maraqlıdı...
* 24-cü tur Vüqar Mustafayev üçün əlamətdar olub. “Sumqayıt”ın müdafiəçisi çempionatda 200-cü matçını keçirib. 29 yaşlı futbolçunun yubileyi “Kəpəz”lə ev görüşünə təsadüf edib. O, premyer-liqadakı 200 oyunda 2 qol vurub. Mustafayevin debütü 2013/14 mövsümündə “Bakı”da gerçəkləşib. O, premyer-liqada 5 klubun formasını geyib. Müdafiəçi paytaxtın eyniadlı klubunda 16, “Simurq”da 12, “Qarabağ”da 8, “Zirə”də 77, “Sumqayıt”da 87 oyun keçirib. “Qarabağ” və “Zirə”də qol vurub.
* “Kəpəz” Misli premyer-liqasında ardıcıl ikinci qələbəsini qazanıb. 23-cü turda “Şamaxı”nı 3:2 hesabıyla məğlub edən Tərlan Əhmədovun yetirmələri son turda “Sumqayıt”a qalib gəlib. Gəncə təmsilçisi premyer-liqada 6 ildən sonra ardıcıl iki qələbə qazanıb. Sonuncu belə uğur 2016/17 mövsümünə təsadüf edib. 2017-ci ilin aprelində qərblilər ardıcıl 4 matçda 3 xal qazanıb. Gəncəlilər 2017/18 mövsümündə və cari çempionatın əvvəlki turlarında iki qələbədən artıq seriyaya imza atmayıb. Sumqayıtdakı oyun həm də “Kəpəz”in qol vurduğu 400-cü matç kimi tarixə düşüb. Yalnız üç komanda daha çox görüşdə fərqlənib. Bunlar “Qarabağ”, “Neftçi” və “Şamaxı”dı.

RƏŞAD