Kəpəz (Gəncə) – Şamaxı 3:2 (1:1)

71. Mario Mustapiç – 5,0
74. Yusif Nəbiyev (k) – 5,0
78. Yeqor Xvalko – 5,0
14. Elçin Əlicanov - 5,0
3. Abdulla Rzayev – 5,0
7. Giorgi Kantariya – 6,0
77. Fərid Nəbiyev – 6,0
(2. Zamiq Əliyev, 88) – qiymətsiz
40. Ahmed Ayzaya – 5,5
(20. Mahir Həsənov, 83) – qiymətsiz
9. Mate Kvirkviya – 6,5
(70. Nicat Süleymanov, 83) – qiymətsiz
21. Martins Junior – 6,0
(80. Tural Rzayev, 90+1) – qiymətsiz
19. Abdullahi Şuaybu – 6,0

Ehtiyat oyunçular
25. Elgün Bayramov
8. Tural Axundov
5. İdris İnqilablı
27. Samir Məhərrəmli
91. Nizami Səmədov
97. Nicat Məmmədov
44. Nihat Fərəci
66. Arzu Atakişiyev
Baş məşqçi: Tərlan Əhmədov
Komandanın ən yaxşısı: Mate Kvirkviya

1. Rəşad Əzizli (k) – 4,5
16. Fuad Bayramov – 5,5
5. Rəhman Daşdəmirov – 4,5
18. Cəlal Hüseynov – 4,0
27. İbrahim Aslanlı – 4,0
(2. Rauf Hüseynli, 21) – 4,0
15. Emin Zamanov – 4,0
(10. Elvin Məmmədov, 65) – 4,0
70. Bahadur Həziyev – 4,5
22. Elçin Mustafayev – 4,0
(29. Ramin Əhmədov, 65) – 3,5
83. Nihad Quliyev – 4,0
23. Rövşən Şahmuradov – 4,0
(79. Emil Qasımov, 73) – 3,5
11. Kamran Quliyev – 4,5
(90. Əli Səmədov, 73) – 3,5
Ehtiyat oyunçular
62. Abdulla Seydəhmədov
12. Əkpər Vəliyev
9. Amil Yunanov
8. Kamal Mirzəyev
17. Elçin Rəhimli
21. Qurban Səfərov
80. Zahid Mərdanov
Baş məşqçi: Vüqar Əsgərli
Komandanın ən yaxşısı: Fuad Bayramov

Qollar: A.Şuaybu, 10 (1:0, F.Nəbiyev). F.Bayramov, 23 (1:1). M.Kvirkviya, 55 (2:1, M.Junior). R.Daşdəmirov, 62 (2:2). M.Kvirkviya, 73 (3:2).

Vərəqələr: A.Ayzaya, 55 (qeyri-idman hərəkəti). N.Quliyev, 70 (qeyri-idman hərəkəti). M.Kvirkviya, 78 (qeyri-idman hərəkəti). B.Həziyev, 89 (qeyri-idman hərəkəti). M.Mustapiç, 90+5 (oyunun bərpasını ləngitmək) – sarı.

Hakimlər: RƏŞAD ƏHMƏDOV (Mingəçevir), Kamran Bayramov, Teymur Teymurov, İnqilab Məmmədov (hamısı Bakı).
VAR hakimi: Rauf Cabarov (Bakı).
VAR hakiminin köməkçisi: Cavanşir Yusifov (Bakı).
Hakim-inspektor: Rəhim Həsənov (Bakı).
AFFA nümayəndəsi: Əsgər Əmirəliyev (Abşeron).
17 fevral. Gəncə. Şəhər stadionu. 955 tamaşaçı (25000 yerlik).
Birinci hissəyə 3, ikinci hissəyə 6 dəqiqə əlavə olunub.
Oyunun qiyməti: 6,0.

Son günlər “Kəpəz”in düşərgəsindən gələn xəbərlərə inansaq, “Şamaxı”ya mümkün məğlubiyyət Tərlan Əhmədovun “sarı-göylər”in “sükanı arxasında” sonuncu matçı ola bilərdi. Bu üzdən dünən Gəncədə keçirilən matça maraq böyük idi. Bəribaşdan qeyd edək ki, Əhmədov üçün prinsipial xarakter daşıyan 90 dəqiqə onun üçün yaxşı qurtardı. Komandası sonda baş məşqçinin üzünü ağ etdi. Halbuki qonaqlar oyunun gedişində iki dəfə hesabda geri düşmələrinə baxmayaraq, “status-kvo”nu bərpa etməyi bacardılar. Hətta hesab 2:2 olarkən üçüncü qolu da yaxın oldular. Ancaq dünən bəxt və futbol tanrısı meydan sahiblərinin tərəfindəydi.

Artıq 10-cu dəqiqədə gəncəlilər ilk qolun sevincini yaşamışdılar. Martins sol cinahda əla texnika və sürət nümayiş etdirib müdafiəçidən sıyrılaraq Fəridə ötürmə etdi. O isə daha əlverişli mövqedə olan Şuaybunu “gördü”. Nigeriyalı forvard şansını qaçırmadı. Yerli azarkeşlər qol sevincinidoyunca yaşamamış Fuad Bayramov meydan sahiblərini mərkəzə dəvət etdi. “Qobu” ləqəbli yarımmüdafiəçi mövsümün ən gözəl qollarından birini vurdu. Bu həm də ilk yarıda vurulan son qol oldu.

İkinci yarı da qarşılıqlı hücumlarla başladı. Bunun məntiqi nəticəsi kimi 55-ci dəqiqədə “Kəpəz”in gürcü legioneri Kvirkviya fərqləndi. Bu dəfə Şuaybu assistent rolunda çıxış etdi. Ancaq “Şamaxı” təslim olmaq istəmirdi. Heszabda geri düşən qonaqlar bərabərliyi təmin etmək üçün böyük qüvvə ilə irəli atılır, rəqibi pressinq hesabına öz cərimə meydançasına sıxışdırmağı bacarırdı. “Şirlər” ikinci qolu standart vəziyyətin davamında vurdu. 62-ci dəqiqədə kornerdən qapı önünə asmanı müdafiəçilər uzaqlaşdıra bilməyincə Daşdəmirov topu çox rahat şəkildə rahatlayıb “çərçivə”yə göndərdi. Qələbə üçün alışıb-yanan meydan sahibləri bəzən tələskənliyə yol verərərək ötürmələrdə səhvlər edir, hücuma çıxarkən qeyri-dəqiq oynayırdılar. Buna baxmayaraq, 73-cü dəqiqədə “sarı-göylər” istəyinə çatdı. Bu dəfə Mate cərimə meydançasındakı qarışıqlıqdan yararlanıb həm dublunu rəsmiləşdirdi, həm də komandasına qələbə gətirdi. Onun zərbəsi elə güclü idi ki, az qala qapı toru cırılacaqdı.

Gözdən qaçmadı

* Təmir işlərinə görə stadionun əsas qapısı bağlandığından klubun əməkdaşları, komandalar arenaya daim bağlı gördüyümüz yuxarı darvazadan daxil oldular.
* 27-ci dəqiqədə “Şamaxı”nın qapıçısı Rəşad Əzizli ilə müdafiəçisi Cəlal Hüseynov arasında narazılıq yaşandı. Bir-birini itələyən futbolçuları komanda yoldaşları sakitləşdirdi.
* Hakim ilk hissənin əsas vaxtına 3 dəqiqə əlavə olunduğunu bildirən tablonu qaldırsa da, stadionun diktoru 1 dəqiqə artırıldığını açıqladı.
* Oyundan sonra topdaşıyan uşaqlardan biri Tərlan Əhmədova yaxınlaşıb nəsə dedi. Onu diqqətlə dinləyən baş məşqçi Şuaybunu yanına çağırıb getrini uşağa verməsini istədi. “Kəpəz”in forvardı Əhmədovun tapşırığını yerinə yetirərək getrlərini çıxarıb həmin uşağa verdi.