Şərq konfransının turnir cədvəlində 8-ci pillədə qərarlaşan “Atlanta” rəsmi saytı vasitəsi ilə baş məşqçi Neyt Makmillanın qovulduğunu xəbər verib.

Onun səlahiyyətlərini köməkçisi Co Pranti müvəqqəti yerinə yetirəcək. 2021-ci il iyulun 8-də “sükan arxasına” keçən Makmillan klub tarixinə 14-cü baş məşqçi kimi düşmüşdü. Komanda onun rəhbərliyi altında 99 qələbə qazanıb, 80 oyunda uduzub. Klubun baş meneceri Lendri Filds bu qərarla bağlı belə deyib: “Liderlik keyfiyyətlərinə və peşəkarlığına görə Neytə təşəkkür etmək istəyirəm. Biz onun işini dəyərləndiririk. Belə qərarlar — xüsusən də mövsümün gedişində veriləndə - həmişə hədsiz çətindi, ancaq belə hesab edirik ki, indi “sükan arxasında” başqa adamın olması komandamızın maraqlarına uyğundu”.

Bu arada “Bruklin” baş məşqçi Jak Vonla müqavilə müddətinin daha bir neçə il uzadıldığını elan edib. 28 yaşlı mütəxəssis ötən il noyabrın 1-dən bu komandanı çalışdırır. O, Stiv Neşi əvəz edib. Komanda Vonun rəhbərliyi altında keçirdiyi oyunların 32-də qələbə qazanıb, 19-da uduzub.

ESPN-in yaydığı xəbərə görə, “Bruklin”in baş məşqçi ilə yeni müqaviləsi 2026/27 mövsümünün sonuna qədər nəzərdə tutulub. “Nets” hazırda Şərq konfransının turnir cədvəlində 6-cı pillədə qərarlaşıb.