Milli komandaların oyunları ilə bağlı premyer-liqa və 1-ci divizionda fasilə yaranıb.

Ayın sonuna kimi futbolsevərlərin gözü yığmanın görüşlərində olacaq. Lakin Region Liqasında mübarizə qaldığı yerdən davam edir. Turnirin pley-off mərhələsinin görüşləri start götürüb. Burda bizi 6 maraqlı qarşılaşma gözləyir. Komandaların adlarına və təmsil etdiyi rayonlara nəzər yetirdikdə, əsl mübarizəyə şahidlik edəcəyimizi düşünə bilərik.

Çempionatla bağlı redaksiyamıza maraqlı informasiya daxil olub. AFFA turnirə marağı artırmaq və mübarizəni son həddə çatdırmaq üçün pley-off iştirakçılarına maraqlı vəd verib. Belə ki, mərhələni adlayan komandalar növbəti mövsüm 1-ci divizionda çıxış edəcək. Bu isə iştirakçıların motivasiyasının artmasına səbəb olub. Artıq bir neçə klub pley-off mərhələsində oyunların təşkilatçılığı ilə bağlı işlər görməyə başlayıb. Region Liqası təmsilçilərinin rəhbərləri həm mərhələni keçmək, həm də federasiyanın diqqətini çəkmək üçün azarkeşlərin matçlara gəlməsinə çalışır, futbolçulara az da olsa, mükafat söz veriblər.

Məlumatın nə dərəcədə doğru olub-olmadığını yoxlamaq üçün kiçik araşdırma aparmaq qərarına gəldik. Region Liqasının pley-offundakı cütlərə nəzər salaq:

“Ağsu Siti” - “Karvan” 2:0
“İmişli” - “Cəbrayıl” 1:5
“Qusar” - “Ağstafa”
“Astara” - Füzuli”
“Energetik” - “Ümid”
“Xan Lənkəran” - “Şirvanovka”

Komandaların qrup mərhələsindəki oyunlarını, maliyyələrini nəzərə alıb, hansının növbəti mərhələyə keçəcəyini indidən demək mümkündü. “Ağsu Siti” - “Karvan” cütündə hər iki meyar baxımından birincilərin qələbə şansını daha yüksək qiymətləndirmək olar. “İmişli” - “Cəbrayıl” duelindən Cavid Hüseynovun komandasının növbəti mərhələyə yüksələcəyini deyə bilərik. “Qusar”ın “Ağstafa”nı rahat keçəcəyi də şübhə doğurmur. “Energetik” - “Ümid” duelində mingəçevirlilər aşkar favoritdi. Ən çətin təxmin “Xan Lənkəran” - “Şirvanovka” cütünə aiddi. Lənkəran təmsilçisinin Antalyada təlim-məşq toplanışı keçdiyini, futbolçuların daha peşəkar olduğunu nəzərə alıb, favorit saymaq olar. Təxminlərimizə inansaq, növbəti mərhələdə bu komandalar mübarizə aparacaq: “Ağsu Siti”, “Cəbrayıl”, “Qusar”, “Füzuli”, “Energetik”, “Xan Lənkəran”.

Bu komandaların normal büdcəsi və 1-ci divizon səviyyəsində stadionları var. Sadəcə, “Qusar”da arena baxımdan problem davam edir. Lakin bunu da həll etmək asandı. Komanda hazırda oyunlarını Xızıda keçirir. Divizionda iştirak edəcəyi təqdirdə, öz stadionu təmir olunana kimi Quba Olimpiya Kompleksində də oynaya bilər. Region Liqasının yarımfinalından mübarizəyə qoşulacaq “Araz Naxçıvan” haqda isə danışmağa ehtiyac yoxdu. Komanda nə infrastruktur, nə də maliyyə baxımından problem yaşayır. Bunları nəzərə alan AFFA adı çəkilən klubların peşəkarlaşmasına çalışır. Buna görə də Futbolun İnkişafı Fondunun üzvlərinə bu klublara maliyyə ayırması üçün şəxslərin tapılması istiqamətində tapşırıq verilib. Bununla da AFFA ölkə futbolunun arealının genişlənməsinə çalışır. İstək yaxşı, təşəbbüs əla. Bacararlarsa, nə gözəl!

İLKİN SULTANLI

Yazı "Futbol+" qəzetinin dünənki sayında işıq üzü görüb.