"Neftçi" iki gün əvvəl Konfrans Liqasının 3-cü təsnifat mərhələsində "Rapid"i qəbul etdi.

Football-plus.az saytı olaraq 2:1 qələbə qazandığımız matçla bağlı təcrübəli Yunis Hüseynovun fikirlərini öyrəndik:

"Açıq danışmaq lazımdı ki, "Rapid"i gözümüzdə çox böyütmüşdük. Rəqibi qiymətləndirməməyi, ona yuxarıdan aşağı baxmağı demirəm. Sadəcə, psixoloji cəhətdən bir qədər Avstriya təmsilçisini çox güclü kimi qələmə vermişdik. İlk dəqiqələrdən məhz bunun nəticəsiydi ki, "Neftçi" çox ehtiyatlı oynayırdı. Amma tədricən bakılılar irəli çıxaraq, rəqib qapısı önündə təhlükəli vəziyyətlər yaratmaqla göstərdi ki, "Rapid"lə oynamaq olar. "Ağ-qaralar" nə qədər yaradıcılığı ilə diqqəti çəksə də, komandada hələ vahid oyun planı yoxdu. "Neftçi" daha çox əks-hücumlarda effektliydi. Müdafiədə boşluqlar hiss olunur. Rəqib matçboyu cinahlardan reyd edərkən müdafiəçiləri arxada qoyur, mərkəzə ünvanlanan ötürmələrə yaxşı açılırdılar. Elə qolu da həmin cinahdan, həm də mərkəz müdafiəçilərinin effektli oynamaması üzündən buraxdıq. Azər Salahlı ilə Rəhman Hacıyevin oyunu xoşuma gəlmədi. İkinci matçın sonlarında yaxşı fürsət yaxaladı. Topu daha yaxşı saxlayaraq fərqlənə bilsəydi, oyunun axarı tam fərqli olardı. Bəlkə də cütün taleyini 70 faiz həll edərdik. Uzatma dəqiqəsində buraxdığımız qol heç yerinə düşmədi. Hesab 2:0 olsaydı, şansları 50-nin 50-yə dəyərləndirərdim. 2:1 isə 60-ın 40-a rəqibin xeyrinədi. Ümid edək ki, "Neftçi" Avstriyadakı cavab matçında müdafiədə daha yaxşı qapanacaq və rəqib hücuma atılarkən verəcəyi boşluqlardan maksimum istifadə edəcək".