Dəhşətli zəlzələdən sonra superliqadan çəkilmək qərarına gələn “Hatayspor”un baş meneceri Fatih İlək dağıntılar altında qaldığı güman edilən və hələ də haqqında heç bir məlumat olmayan məşhur qanalı futbolçu Kristian Atsu barədə “Radyospor”a diqqətçəkən açıqlamalar verib.

Atsu ilə yanaşı, klubun idman direktoru Tanər Savut da hələ də dağıntılar altındadı. Fatih İləki dinləyək: “Bizim qaldığımız otel də tamə dağıldı. Amma biz ordan sağ-salamat çıxdıq. 3 nəfər idik. Dağıntılar altından çıxandan sonra bazaya getdik. Volkan Dəmirəl futbolçuları sakitləşdirməyə çalışırdı. Sonra o, idman direktoru Tanər Savuta zəng vurdu. Sanki bir ara səsini eşitdik və sonra əlaqə kəsildi. Bu, bizə az da olsa, ümid vermişdi. O anları qorxulu bir yuxu kimi xatırlayıram. Digər yönətici Mehmet Güzəl dağılan binada xilasetmə işlərinin tez başlaması üçün əlindən gələni etdi. Amma işlər yalnız çərşənbə günü başladı.

Başqanımız Lütfü Savaşın da qohumları arasında dünyasını dəyişənlər çoxdu. Buna baxmayaraq, insanlar onun barəsində ağır və aşağılayıcı sözlər yazırlar. Başqanın burda heç bir günahı yoxdu. Tanər Savut hər kəs tərəfindən sevilən bir insan idi. Çox xahiş edirəm, Savutla Atsunun ailəsini üzəcək paylaşımlar edilməsin. Zəlzələdən bir həftə əvvəl “Qaziantep”lə səfərdə qarşılaşdıq.

Bütün oyunu ehtiyatda keçirən Atsu o matçdan öncə Volkan Dəmirələ yaxınlaşaraq daha çox oynamaq istədiyini demişdi. Ona görə də özünə uyğun klub tapacağı təqdirdə ayrılacağını söyləmişdi. Məşqçimiz onun istəyini anlayışla qarşılayaraq etiraz etməmişdi. “Kasımpaşa” ilə ev oyununda Dəmirəl ona start heyətində şans verdi. Atsunun oyundan sonra bileti var idi və Türkiyəni tərk etməliydi. Son qarşılaşmada əla performans sərgilədi və son saniyələrdə qələbə qolumuzu vurdu. Həmin qələbədən sonra paltardəyişmə otağında çox gözəl ab-hava var idi. Volkan Dəmirəl hamının içində Atsunu qucaqlayaraq onu xüsusi təbrik etdi. Bu anlar gözümün önündən getmir və onları həmişə xatırlayacam. Çünki Atsunun taleyini həll edən məqam məhz o zaman yaşandı.

Təsəvvür edin ki, təyyarə bileti əlində olsa da, yaxşı oynadığı və qol vurduğu üçün son anda ayrılmaqdan vaz keçdi! Yaşadığı böyük coşqudan sonra “ayrılmaq istəmirəm, burda qalacam” dedi. Bəlkə də həyatının ən xoşbəxt anlarından birində zəlzələyə yaxalandı. Onun təyyarəsi bazar günü saat 23.00-da uçmalıydı. Əvvəlcə İstanbula, ordan da Fransaya gedəcəkdi. Çox böyük və sözlə ifadə edilməyəcək bir faciədi”.
Atsunun yaxınları – qardaşı və meneceri isə hələ də Türkiyədədi. Onlar hər gün səhər arxası üstə aşmış “Renessans Rezidens”in qarşısına gələrək möcüzə yaşanması üçün dua edirlər. Həmin binada artıq 4-cü gündü axtarış əməliyyatları davam etdirilir. Atsunun qaldığı və ona yaxın olan evlər ələk-vələk edilsə də, heç bir xəbər yoxdu.

Yaxınları xəstəxanalara Atsunun şəkillərini göndərmək istəyir. Qardaşı Tvasam inanır ki, Atsu xilas edilib və hansısa xəstəxanada koma vəziyyətindədi.