"Əvvəla onu deyim ki, Gəncə özünə görə ağırlığı olan bir şəhərdi. Buranın sakinləriylə Bakının, Sumqayıtın əhalisini bir tutmaq olmaz. Əlbəttə, "Kəpəz"ə rəhbərlik etdiyim dövrdə mənə də təzyiqlər olub. İstər şəhərin veteran futbolçuları, istər məşqçilər, istərsə də azarkeşlər arasında məni gözü götürməyənlər var idi. Hətta olub ki, çempionatın ilk turunda uduzanda istefaya səsləyiblər. Amma bunu hamıya şamil etmək olmaz. Həmçinin Gəncədə bu halın ifrat dərəcədə olduğunu da demək düzgün deyil. 50-nin 50-yədi. Bir çox hallarda jurnalistlər də bundan öz məqsədləri üçün istifadə etməklə vur-çatlasın yaradırlar".

"Mən də "Kəpəz"də çalışarkən özümə qarşı qarayaxma, gözümçıxdıyasalma hallarına rast gəlmişəm. Bu da faydalı iş əmsalına və komandanın çıxışına təsir edirdi. Belə neqativ hallar indi də Tərlan Əhmədova qarşı həyata keçirilir. Bu xoş hal deyil. Tərlan müəllimin "Kəpəz"ə gəlişindən sonra komandanın oyununda canlanma, nəticələrində inkişaf var. Gəncə təmsilçisini elitada saxlamaq iqtidarındadı. İmkan verin, adam qarşıya qoyulan tələbi yerinə yetirsin, ondan sonra lazım gəlsə, onunla yolları da ayıra bilərsiz. Bu gün komandanı düşdüyü bataqlıqdan çıxarmağa çalışan şəxsə qarayaxmadan, gözümçıxdıyasalmadan, hər cür maneə yaradılmasından itirən Gəncə futbolu. Bunu istəmiriksə, söz-söhbətə son qoyub, hamılıqla Tərlan Əhmədova kömək etməliyik. Yoxsa ölkənin ikinci böyük şəhərinin klubu faciəylə üzləşəcək".