“Əvvəlcə özümü tanıdım. 1958-ci ildə Gəncədə anadan olmuşam. Orta və ilk orta-ixtisas musiqi təhsilimi bu şəhərdə almışam. 1979-dan isə Bakıda yaşayıram. İki akademik təhsilim var. Həm Musiqi Akademiyasını, həm də Heydər Əliyevin sərəncamı ilə 1999-2002 aralığında Azərbaycan Prezidenti yanında Dövlət İdarəçilik Akademiyasını bitirmişəm. 11 yaşımdan “Kəpəz”in sadiq azarkeşiyəm. Gəncə futbolunun çox tanınmış nümayəndələri olub ki, bunu bütün ölkə bilir. İstər ötən əsrdə, istərsə də müstəqillik illərində Gəncə Azərbaycan futboluna tanınmış simalar bəxş edib. Yəqin heç kim bunu danmaz. Ötən əsrin 90-cı ilnin əvvəlləri idi. Zakir Məmmədov kluba sponsorluq edirdi. “Kəpəz”in uğur qazanması üçün Əhməd Ələsgərovu Odessadan Gəncəyə gətirmişdi. Həmin vaxt komandanın oyunları bir tərəfə, məşqlərinə minlərlə azarkeş toplaşırdı. İndi görün “Kəpəz” necə acınacaqlı vəziyyətə düşüb. Çox təəssüf ki, bu gün klubun idarəçiliyi, rəhbərliyi naşı adamların əlindədi. Bu yaxınlarda Müşahidə Şurasının sədri İlqar Nadiriyə zəng vurdum. Komandanın niyə belə rəzil günə düşməsinin səbəbi ilə maraqlandım. Mənə nağıl danışmağa başladı. Gah dedi, “pul yoxdu”, gah “evimi satıb komandaya xərcləmişəm, ancaq heç nə alınmır” söylədi. Gah da bacara bilmədiklərini vurğuladı. Belə klub rəhbəri olar? Düşərgədə nizam-intizam aşağı səviyyədədi. Bunu hamı görür, bilir. Futbolçular məndən inciməsin, düzünü deyəcəm. Ustalıq səviyyəsi aşağı olan oyunçuların hamısını “Kəpəz”ə cəlb ediblər. Görün klub nə gündədi ki, stadiona tablo qoya bilmirlər. Görəsən, İlqar Nadiri Gəncə futbolunun tarixindən, ənənələrindən xəbərdardı, bu şəhərin yetirmələrini tanıyır? Əvəzetmələr zamanı istifadə olunan elektron tablo belə yoxdu. Niyə bu rəhbərlik Gəncəni ölkədə biabır edir? Ona Gəncənin böyük şəhər, Nizami yurdu, Cavad xanın eli olduğunu bir daha xatırlatdım. Burda böyük ədiblərin yaşadığını söylədim. Söhbət əsanasında Nadiriyə bu insanların ruhu xatirinə klubdan getməli olduqlarını bildirdim. Kluba futbolu bilən mütəxəssislər gəlməlidi. Maşallah Əhmədovun söylədikləri ilə tanışam. Klubda məhz Əhmədov, Mehman Allahverdiyev, Asif Əliyev, Vəli Qasımov kimi bu şəhərdən çıxan futbol adamları çalışmalıdı. Bu şəhərin özünəxas ab-havası, mentallığı var. Gəncə azarkeşi kənardan gələn mütəxəssisi heç vaxt qəbul etməyib. Bu gün “sükan arxasında” Əhməd Ələsgərov çapında məşqçi olsaydı, bəlkə də gəncəlilər onu qəbul edərdi. Mərhum Sergey Kramarenko, dünyasını dəyişən Rəşid Özbəyov, həyatda olan Mehman Allahverdiyev kütlə tərəfindən sevilib və qəbul olunub. İndiki rəhbərliyi isə Gəncədə ürəyi futbolla döyünən insanların çoxu qəbul etmir. Sizi əmin edirəm ki, uğursuzluqlar sıralandıqca, klubu indi idarə edənlər bir müddət sonra qaçıb gedəcəklər. Komanda yenə qalacaq kiminsə ümidinə. Mətbuat vasitəsi ilə bu yodaşlardan xahiş edirəm, çəkilin kənara, imkan verin kluba futbolu bilən mütəxəssislər gəlsin”.
Sonda Şahin bəy Gənclər və İdman Nazirliyinə, AFFA-ya, Gəncənin icra başçısına müraciət etməyi də unutmadı: “Gəncə futbolla nəfəs alan şəhərdi. Aidiyyatı qurumlardan xahiş edirəm, şəhərdə futbolun dirçəlməsi, aşağı yaş qruplarının inkişafı naminə əllərindən gələni əsirgəməsinlər. Stadionun bərpası üçün lazımi tədbirlər görsünlər. Bir də üzümü Gəncənin imkanlı şəxslərinə, ölkə xaricində yaşayan gəncəlilərə tutub deyirəm: şəhərin futbol infrastrukturunun bərpası, “Kəpəz”in əvvəlki əzəmətini geri qaytarmaq üçün siz də nəsə edin, yardımınızı əsirgəməyin”.