Yaşar Vahabzadənin istefasından sonra “Kəpəz”in baş məşqçi postu hələ də boşdu.

Deyəsən, klubun icraçı direktoru İlqar Nadiri boş qalan kresloya gəncəli mütəxəssis tapıb əyləşdirə bilmir. Niyə məhz gəncəli? Çünki klub rəsmisi bir neçə gün öncə “Futbol+”ə açıqlamasında “sükan arxasına” Gəncədən olan baş məşqçi axtardıqlarını demişdi.

Söylənilənlərə inansaq, əslində İlqar bəy axtardığını tapıb. İcraçı direktor hazırda “Zirə-2”nin çalışdıran Azər Məmmədovu və ya PRO kateqoriyaslna malik Etibar İbrahimovu “Kəpəz”in baş məşqçisi görmək istəyib. Hətta “Qarabağ”la oyundan sonra bununla bağlı “yuxarılar”la danışıb. Hər iki çalışdırıcı əslən ölkənin ikinci ən böyük şəhərindəndi. Ancaq ona “dəvədən böyük fil var” məsəlini xatırladıblar. AFFA-dan “sən öz işinlə məşğul ol, baş məşqçini biz təyin edəcəyik” deyilib. Qurumun boş qalan posta namizədi isə Tərlan Əhmədovdu.
Etibarlı mənbədən əldə etdiyimiz məlumata görə, Şahin Diniyevin imtinasından sonra Tərln bəy bu missiyanı üzərinə götürüb. Yəqin ki, mütəxəssis yaxın saatlarda “Kəpəz”in baş məşqçisi kimi ictimaiyətə təqdim olunacaq. Mənbəmiz onu da bildirdi ki, Əhmədov artıq köməkçilərini də müəyyənləşdirib. Məşqçilər korpusunda Novruz Əzimovla Elmir Xankişiyevin yer alacağı söylənilir.

RƏŞAD