Avropanın dörd bir tərəfindən futbolçuların və klubların Türkiyəyə həm maddi, həm də mənəvi dəstəyi davam edir.

“Böyük beşliy”in, “ikinci eşelon”un, eləcə də bir çox başqa ölkələrin çempionatlarında həftəsonu keçirilən bəzi qarşılaşmalardan öncə Türkiyə və Suriyada zəlzələdə dünyasını dəyişənlərin xatirəsi birdəqiqəlik sükutla yad olundu.

Məşhur türkiyəli şoumen Acun Ilıcalının sahibi olduğu çempionşip təmsilçisi “Hall Siti”də kənarda qalmadı. Bu komanda şənbə günü “Stok Siti” ilə səfər oyunundan (0:0) öncə birdəqiqəlik sükut zamanı Türkiyə bayrağını açdı. Yeri gəlmişkən, Ilıcalı fevralın 16-da Konfrans Liqasının pley-offu çərçivəsində keçiriləcək “Trabzonspor” – “Bazel” matçının “TV8” kanalında, yəni açıq kanalda yayınlanacağını bildirib. Reklam gəlirlərindən əldə olunacaq pulun hamısı yardım fonduna köçürüləcək. Bilindiyi kimi, Türkiyədə avrokubok oyunları pullu platforma olan “Exxen”də yayınlanır. Həm “Exxen”in, həm də “TV8”-in sahibi Acun özüdü.

Avropada çıxış edən türkiyəli futbolçular da dəstəyini davam etdirir. Məsələn, “Xetafe”nin forvardı Enes Ünal La Liqanın son turunda “Rayo Valyekano” ilə səfər oyununda qol vurandan sonra kameralara üzərində “Pray for Turkey and Syria” (Türkiyə və Suriya üçün dua edin) sözü yazılmış formanı göstərdi. Həm bu, həm də La Liqanın digər qarşılaşmalarından öncə birdəqiqəlik sükut oldu.

Ümumiyyətlə, ispanlar dəstək baxımından fəallığı ilə seçilir. Yerli mətbuatın yazdığına görə, Madrid klublarının öz aralarında yardım xarakterli bir oyun keçirməsi gündəmdədi. Oyun ya “Real”ın, ya da “Atletiko”nun meydanında baş tutacaq. Quti və Roberto Karlos kimi Türkiyədə oynamış sabiq ulduzlar da bu matçda iştirak etməyə hazır olduqlarını bildiriblər. Almaniyada “Verder” – “Borussiya” (D) oyununa hər iki klubun üzvləri qara sarğı ilə çıxdılar. Bundan başqa, oyundan öncə hər iki klubun oyunçuları üzərində alman dilində “zəlzələnin qurbanlarına birlikdə yardım edək” yazılmış bir pankartla çıxdılar. Oyundan sonra isə formalar hərraca çıxarıldı. Belə güman olunur ki, bu addımların atılmasında hər iki klubda forma geymiş türkiyəli müdafiəçi Ömər Toprakın böyük rolu olub. Niderland çempionatında “türklərin komandası” “Fortuna” üçün tur uğurlu alındı. Özü də “Emmen”lə səfər oyununda (1:0) qələbə qolunu türkiyəli Oğuzhan Özyakup vurdu. Təbii ki, o da qoldan sonra vətəninə dəstək nümayiş etdirdi. Bu oyundan öncə birdəqiqəlik sükut zamanı isə Burak Yılmaz göz yaşını saxlaya bilmədi. Eləcə də Avropada çıxış edən digər türkiyəlilər – Doğan Ələmdar (Renn), Tolqa Ciğərci (Herta), Cengiz Ündər (Marsel) də istər oyunlardan öncə, istərsə də final fitindən sonra Türkiyəyə dəstək verdilər. Türkiyə yığmasının baş məşqçisi Ştefan Kunts isə Almaniyada yaşadığı bölgədəki bir marketdə əynində ay-ulduzlu forma ola-ola, kassirlik etdi. O, zəlzələ üçün yardım kampaniyası çərçivəsində 10 min avro toplayaraq AFAD-a göndərdi. Ən son Merih Dəmiralın kampaniyasına Canluici Buffon da qoşularaq əlcəklərini hərraca çıxardı. Dünyaca ünlü argentinalı superulduz Lionel Messi isə “instaqram”ının hekayə bölümündə qəlbinin Türkiyə və Suriyada zəlzələdən əziyyət çəkənlərlə birlikdə olduğunu yazdı. Bundan başqa, Messi UNİCEF-in başlatdığı yardım kampaniyasını da paylaşdı.

Bu qədər dəstəyin fonunda İlkay Gündoğanın addımı isə birmənalı qarşılanmadı və tənqidlərə səbəb oldu. Bilindiyi kimi, bazar günü “Mançester Siti”nin “Aston Villa”nı 3:1 hesabıyla yendiyi qarşılaşmada meydan sahiblərinin ikinci qolunu bu qürbətçi futbolçu vurdu. Amma İlkay qol sevinci zamanı Türkiyəyə heç bir dəstək nümayiş etdirmədi. Görünür, təcrübəli futbolçu, sadəcə, dəstək verməyi unudubmuş. Çünki qarşılaşmadan dərhal sonra Gündoğan “instaqram”da ağ-qara fonda şəkil paylaşaraq “vacib qələbə qazansaq da, düşüncələrim hələ də Türkiyə və Suriyada baş vermiş dəhşətli zəlzələdən əziyyət çəkən, dağıntıların altında qalan insanların və yorulmaq bilmədən çalışan xilasedicilərin yanındadı” ifadəsini yazdı. İlkay daha öncə Qaziantep və Hataya lazımi ləvazimatlarla dolu olan bir neçə TIR göndərib.