"Zəlzələdən əvvəl Türkiyəyə getmişdim. Bir həftə idi Ankaradaydım. Buna rəğmən, paytaxtda da təbii fəlakəti dalğasını hiss etdik. Mən əslən Muş şəhərindənəm, amma qohum-əqrəbamın çoxu Qaziantepdə yaşayır. Hər iki şəhər, demək olar, dağılıb. Şükürlər olsun, əzizlərim, qohumlarım arasında ölən və ağır yaralananlar yoxdu. Zəlzələ nəticəsində insanların dağıntılar altında həlak olması, onminlərlə soydaşımızın soyuqda, ağır hava şəraitində küçələrdə, çöldə qalması da ayrıca faciədi. Ankaraya təxliyə olunan, evləri yıxılan, həyatları məhv olan, yaxınlarını itirən, zavallı insanları gözlərimlə gördüm. Bunu görmək və danışmaq mənim üçün olduqca ağırdı. Sağ olsun Azərbaycan dövləti və qardaşlarımız. Zəlzələnin baş verdiyi ilk dəqiqələrdən bizi tək qoymadılar. Bir daha sübut olundu ki, “bir millət, iki dövlət" şüarını yalnız dildə yox, əməldə də göstəririk. Azərbaycanlı qardaşlarımız dağıntılar altında qalanların xilas olunması üçün dəridən-qabıqdan çıxır. Azərbaycan xalqının isə ürəyi bizimlədi. Yüzminlərlə azərbaycanlının Türkiyə üçün etdikləri göz önündədi. Kasıbdan varlıya, 7-dən 70-ə bütün azərbaycanlılar əlindən gələni edir, ev əşyalarını, pal-paltarını, pulunu əsirgəmir. Bir nəfərin evindəki əşyaları köhnə avtomobilinə yükləməklə dağıntılar altında qalanlara yetişdirmək üçün tələsməsi Azərbaycan xalqının bizə qarşı necə fədakar, canıyanan, doğma olduğunun bariz nümunəsidi. Allah bizim dostluğumuzu, qardaşlığımızı daim möhkəm etsin. Azərbaycan xalqına dərin minnətdarlığımı, təşəkkürümü bildirir, onları bağrıma basıram. "Qarabağ" klubu və "Azərsun Holdinq" olaraq, biz də yaxın günlərdə Türkiyə üçün yardımlara başlayacağıq".