''Adana Dəmirspor''un norveçli forvardı Fredrik Qulbrandsen zəlzələ vaxtı yaşadıqlarını Norveçin ''TV2'' kanalına açıqlayıb.

Football-plus.az xəbər verir ki, son 3 mövsümdə ''İstanbul BŞ''nin şərəfini qoruyan və Adana klubunda ilk mövsümünü keçirən 30 yaşlı futbolçu Türkiyə Futbol Federasiyasını da tənqid edib:

''Böyük bir psixoloji travma və sözlə izah edilməsi çətin olan şeylər yaşadım. Mənim və tanışlarımın durumu yaxşıdı. Amma fikrim dağıntıların altında olan insanlarda qalıb. İnanılmaz dərəcədə böyük bir felaket var.

Mən 14-cü mərtəbədə yaşayırdım. Həmin vaxt yatmışdım və birdən-birə hər şey tərpənməyə başladı. Azalmaq əvəzinə getdikcə daha da güclənirdi. Hətta yerimdən qalxmaq istəyərkən yerə yıxıldım. Çünki ayaq üstə durmaq mümkün deyildi. İnsan ölüm anını hiss etdikdə tamamilə həyatda qalmaq çabalamağa başlayır. Tez bir-iki geyimimi götürüb 14-cü mərtəbədən aşağı qaçmağa başladım. Bəxtimizdən yaşadığımız bina möhkəm idi və ona heç nə olmadı. Federasiya oyunları yalnız 1 həftəliyə təxirə salıb. Təsəvvür edirsiz? Cəmi 1 həftə! Zəlzələnin yaşandığı yerlərdə saysız-hesabsız insan həyat uğrunda mübarizə apararkən biz necə futbol oynayacağıq? Bunu anlamıram. Hələ də yaşadıqlarımın və gördüklərimin şokunu üzərimdən ata bilməmişəm.

Belə görürəm ki, bu ölkədə futbolun başında duranlar nə qədər çox insanın acı çəkdiyini anlamayıb. Sağ qurtulanlar da hələ özlərinə gələ bilməyib''.

Xatırladaq ki, federasiyanın qərarı ilə bu həftə sonu baş tutmalı olan oyunlar gələn həftəsonuna, yəni fevralın 17-20-nə keçirilib.