Füri üstündü, yoxsa Usik?
Tayson Füri – Aleksandr Usik döyüşü ilə bağlı hələ heç bir detal dəqiqləşmədiyi halda, boks dünyası ən müxtəlif fikir və proqnozlar söyləməkdədi.
Football-plus.az xəbər verir ki, atmacaların əsasını qoyan Füri bu dəfə mümkün rəqibi haqda “qoca” ifadəsini işlədib. Halbuku britaniyalı ukraynalı Usikdən cəmi bir yaş kiçikdi:
“Usik məndən böyükdü. Onun 22 yaşı olsaydı, hər şey fərqli olardı, ancaq qocadı. Həvəskar səviyyədə 300, peşəkar səviyyədə 20 döyüş keçirib, yorulub, sürtülüb. Düşünmürəm ki, boksda ayaqları ilə yaxşı işləyir və məni döyə biləcəyinə də inanmıram”.
Taysonun atası Con Füri də bu yöndə müzakirələrə qoşulub:
“Usik Taysonu döyməyəcək. O, çox effektlidi, nə etdiyini və nəyi edə bilmədiyini də görürəm. Usiki Taysonun Çisora ilə döyüşündə gördüm. Sadəcə, çox kiçikdi. Əla boksçudu. Ancaq balacadı. Böyük boksçu kiçiyə qalib gələcək”.
Maraqlıdı ki, superağır çəkidə sabiq mütləq dünya çempionu Lennoks Lüis də eyni cür düşünür:
“Usiki dəyərləndirməmək olmaz. O, üç versiya üzrə dünya çempionudu. İndiyə qədər uduzmayıb. Döyüşlərə həm fiziki, həm də psixoloji cəhətdən hazırlaşır. Bizi əla döyüş gözləyir. Usik rinqə məğlubiyyət yox, qələbə düşüncəsi ilə çıxacaq və bunun üçün əlindən gələni edəcək. Ancaq o, boyu 204 santimetr yox, 214 santimetr olan rəqiblə döyüşəcək. Üstəlik Füri hər iki pozada əla döyüşür. Həmişə deyirəm – böyük yaxşı boksçu kiçik yaxşı boksçuya qalib gələcək”.
“Queensberry Promotions”un rəhbəri Frenk Uorren isə WBC versiyası üzrə superağır çəkidə çempion Fürinin Usikdən hər şeydə güclü olduğunu bildiribb:
“Düşünürəm ki, Füri Usiki nokauta salacaq. Füri onun üçün hədsiz böyükdü. İkisi də bir-birinə oxşayır, möhtəşəm döyüş zəkasına malikdilər, ancaq hesab edirəm ki, Taysonun yaxşı tərəfləri Usikin yaxşı tərəfləri ilə müqayisədə daha artıqdı. Füri hər şeydə ondan güclüdü”.
Xatırladaq ki, 34 yaşlı Füri dekabrın 3-də Londonda keçirilən döyüşdə Derek Çisoraya texniki nokautla qalib gəlib. 35 yaşlı Usik isə avqustun 20-də Ciddədə keçirilən döyüçdə Entoni Coşuadan üstün olub.
Digər xəbərlər
