Şənbə günü Gəncədəydim.

Maraqlı keçən “Kəpəz” – “Qarabağ” matçını izlədim. Bu mövsüm şəhərə 3-cü səfərim idi. Dəfələrlə stadiondakı problemləri, komandadaxili məsələləri işıqlandırmışam. Bu dəfə istədim ki, oyundan sonra futbolçulardan açıqlamalar, müsahibələr alım. Çünki mənim “Futbol+” qəzeti rəhbərliyi qarşısında öhdəliyim var. Uzatmağa gərək yoxdu. İşimi görməliyəm. Hər dəfə oyunlardan sonra hörmət əlaməti kimi klubların mətbuat katiblərinə hansısa futbolçudan açıqlama/müsahibə alacağım haqda məlumat verirəm. Bu dəfə “sarı-göylər”in sözçüsü Azad Mustafayevə yaxınlaşdım. Mətbuat katibi ilə aramızda olan dialoqu olduğu kimi təqdim edirəm:

- Azad müəllim, futbolçularla oyun haqda danışmaqda problem yoxdu ki?
- Yox, olmaz!

- Niyə?
- Başqa jurnalistlər inciyirlər ki, niyə ancaq onlara danışmağa icazə verirsən. Oyunçuların açıqlama və müsahibələri rəsmi “feysbuk” səhifəmizdə veriləcək. Hamı kimi, sən də götürə bilərsən.

- Başqalarından fərqli mən Gəncəyə gəlmişəm. Kimsə evindən rahat işləmək istəyirsə, bundan mənə nə? Mənim də müdirim deyir ki, Gəncəyə getdin, nə iş gördün? Nə cavab verəcəm?
- İndi müsahibəyə icazə yoxdu. Başqa mövzulara toxunulur.

- Mən oyun və matçətrafı məsələlər haqda danışacam.
- Olmaz.

Mövzunu çox uzatmadım. Bilirəm ki, bu məsələ həmkarımızdan asılı deyil. Ya Tərlan Əhmədov, ya da klub rəhbərliyi ona belə tapşırıq verib. Bu səbəbdən də mətbuat konfransına yollandım. Tərlan Əhmədov fikirlərini səsləndirəndən sonra ona belə sual ünvanladım:

- Tərlan müəllim, siz işləməyəndə də, indi də mediaya açıq olmusuz. Başa düşdük ki, “Qarabağ”la oyun vacib idi. Matçdan öncə futbolçuların danışmamasını başa düşdüm. İndi niyə icazə yoxdu? Bu sizin qərarınızdı? Rauf Əliyev, Əfran İsmayılov və Elvin Yunuszadə sizə dərs oldu deyə özünüzü “siğortalayırsız” ki, bir də belə hallar yaşanmasın?

Həmkarımız Azad Mustafayev dərhal dinləndi: “Bizdə belə hallar heç vaxt olmayıb. Həmişə mediaya açıq olmuşuq. İndi icazə yoxdu”.

Tərlan Əhmədovla da konfransda qısa dialoqomuz oldu:

- T.Ə.: Bu məsələrlə mətbuat katibimiz, media rəhbərimiz Azad müəllim məşğul olur. Onun yanında suallarınızı verə bilərsiz. İstədiyinizi yaza bilərsiz. Amma futbolçulardan açıqlama almaq icazəlidi.

- İ.S.: Tərlan müəllim, hələ media ilə bağlı belə qərar qəbul olunmayıb. Mənim söz, ifadə və müsahibə almaq azadlığım var. Jurnalist icazə ilə nəsə etməlidi?
- T.Ə.: Təbii ki, siz azadsız. Bizimlə bağlı hər dəfə yazılar yazılıb. İndi futbolçulardan müsahibə götürmək və açıqlama almaq ancaq Azad müəllimin iştirakı ilə ola bilər.

Hər iki şəxslə də söhbətim aşağı-yuxarı eyni oldu. Gəncəyə gedən həmkarlarım da olanları təsdiqləyə bilər. Hətta rekord.az saytının redaktoru Anar Xanlarov Tərlan Əhmədova sual verəndə mənimlə razılaşdığını və “Kəpəz”in mediaya qapalı klub olduğunu bildirdi. “Fanat.az”ın rəhbəri Əli Sahib isə konfrans bitən kimi mətbuat katiblərinin oyundan sonra “miks-zona” təşkil etməli olduğunu vurğuladı. Azad müəllim də dedi ki, bunun üçün şəraitimiz yoxdu.

Bazar günü PFL-in mətbuat katibi Sənan Abdullayevlə bu barədə söhbətimiz oldu. O, klubların mətbuat katiblərinin “miks-zona” təşkil etməli olduqlarını dilə gətirdi:

Bir sözlə, Rauf Əliyev, Əfran İsmayılov və Elvin Yunuszadənin əlində qalan klub problemləri futbolçulara açıqlama və ya müsahibə verməyə qadağa qoymaqla həll etməyə çalışır. Böyük ehtimalla “Kəpəz”in İdarə Heyətinin rəhbəri İlqar Nadiri bu qərarı verib. Çünki onun haqda şəxsən mən “Kəpəz”in problemlərinin səbəbkarı İlqar Nadiridi” başlıqlı yazı yazmışdım. Orda “futbolçularla müqavilə bağlayan zaman klubdaxili məsələləri mediaya açıqlamaq olmaz” bəndinin salınmasının vacibliyini qeyd etmişdim. Hər şeyi kəllə-mayallaq olan Gəncə klubunun rəhbərliyi bu təklifi də səhv anlayaraq futbolçuların danışmasına qadağa qoyub. Nə deyirik. Gəncədə media azadlığımız əlimizdən alındı. Mənə, sadəcə, bəhanələr gülməli gəldi. “Başqaları inciyər” nə demək idi? Azad müəllim qısa-konkret deyə bilərdi ki, rəhbərlik və ya baş məşqçi icazə vermir. Onda nə şiş yanardı, nə də kabab. Belə etməklə, ümumiyyətlə, manqalı aşırdılar.

İLKİN SULTANLI