Şahin Diniyev: "Futbol meydançada bitməlidi"
Misli premyer-liqasında 20-ci turun oyunları keçirilir.
"Səbail" "Kəpəz"i qəbul edib - 1:0. Matçdan sonra meydan sahiblərinin çalışdırıcısı Şahin Diniyevin mətbuat konfransı keçirilib. Sizi mütəxəssisin fikirləri ilə tanış edirik:
"Sürətli, qarşılıqlı hücumlar şəraitində keçən oyun oldu. Hər iki komanda qələbəyə yaxın idi. Kim qalib gəlsəydi, bu, təsadüf olmayacaqdı. Biz şansımızdan istifadə edə bildik. İlk hissədə çox qol vəziyyətlərimiz oldu. İkinci hissədə "Kəpəz"in təzyiqi çoxaldı. Taktiki cəhətdən kompakt şəkildə oynamağa çalışdıq. Rəqibi əks-hücumlarda tutmaq istəyirdik. Buna da nail olduq. Komandanın üzərində böyük psixoloji təzyiq var. Bizə bir qələbə lazım idi. Futbolçularıma təşəkkür edirəm. Komanda oyundan-oyuna artıracaq. Türkiyədə daha çox funksional hazırlığın üzərində işlədik. Bundan sonra taktikanın üzərində çox çalışacağıq. Bu futbolçuların potensialı böyükdür. Mənə sual verirlər ki, niyə legionerlər dəvət etmədiz. Çox çətin dönəmdi. Qışda yaxşı futbolçu tapmaq, onun uyğunlaşması çətindi. Ümid edirəm ki, bu oyunçular mənim etibarımı doğruldacaqlar. Bu gün yaxşı komandaya qalib gələ bildik".
- "Səbail"in ciddi uğurlar qazanacağına inanırsız?
- İnanıram. Bəlkə də yeganə məşqçiyəm ki, hər yerdən istefa verib getmişəm. Görsəm ki, xeyir verə bilmirəm, o zaman gedirəm. Məşqçilik çox çətin işdir. Ciddi uğur dedikdə, bizim iki yolumuz var. Axırıncı yerdən qurtulmaq və kubokda irəli getmək. Bu komandaya, futbolçulara inanıram. İtkilərimiz də var. Ağabala Ramazanovun, Turan Manafovun, Ruslan Hacıyevin olmaması çətinlik yaradı.
- Öz oyun üslubunuzda Rafael Beniteslə uyğunluq görürsüz?
- Onunla bir yerdə adımın çəkilməyi mənim üçün utancdı. Onlar böyük mütəxəssislərdi. Bizim bu gün Qvardiolanın, Mourinyonun nəyisə düz etmədiyini deməyimiz ayıbdı. Mənim öz fəlsəfəm var. Oyunum müdafiədən hücuma keçidlər üzərində qurulub. Hücumları daha çox cinahdan yaratmağa çalışıram. Bu gün də bunlar alınırdı.
- Rahid Əmirquliyevi meydanda görəcəyik?
- 25 futbolçumuz var. Hər biri oynaya bilər. Heç kim deyə bilməzdi ki, bu gün Ədilxan oynayacaq. Matçın gedişindən asılıdı. Rahid də hər zaman hazırdı. Mənə lazımlı futbolçudu. Onun bizimlə olması komanda üçün üstünlükdü. Mütləq oynayacaq.
- "Kəpəz"də çalışmısız bir vaxtlar. İlk qələbəni bu komanda üzərində qazanmaq necə hissdi?
- Məndə heç vaxt prinsip məsələsi olmayıb. Çalışmışam həyatda dürüst olum. "Kəpəz" mənim məşqçilik həyatımda böyük rol oynayır. Bu yaxınlarda ora getmək ehtimalım da oldu. Xeyir verə bilməyəcəyimi düşündüyüm üçün getmədim. Rəqibin kim olması mənim üçün prinsipial xarakter daşımır.
- Kizitonun durumu necədi?
- Menecerimizdən məlumat aldım, durumu normaldı. MRT olunacaq. Yəqin ki, növbəti matçda oynayacaq.
- Öz fəlsəfənizi yeritmək üçün bu heyət kifayət edir?
- Mən gələndə komandada ab-hava da yerində deyildi. İlk işim ab-havası dəyişmək oldu. 14 günlük toplanışda hər şeyi düzəltmək olmur. Çempionluq, ilk üçlük üçün hazır deyilik. Amma son pillədən qurtulmaq və kubokda finala çıxmaq üçün yetərli olan heyətimiz var.
- Komanda müdafiədən çıxmaqda, oyun qurmaqda çətinlik çəkir. Qapıya ilk dəqiq zərbədən qol vurduz. Bəxtinizin gətirdiyini düşünmək olar?
- Futbol səhvlər oyunudu. Qapıya çox zərbəmiz oldu. Futbol bəxt üzərində qurulmayıb. Hər iki komanda çox istəyirdi. Bu oyun heç-heçəlik deyildi. Kimsə qələbə qazanmalı idi. Bugünkü oyunun 50 faizini Şamaxıda oynasaydıq, orada da qələbə qazana bilərdik. Bəli, müdafiədən çıxışda problemimiz var. Bunu oyundan-oyuna düzəldəcəyik. Bu qələbədən sonra komanda daha rahat oynaya biləcək.
- Azarkeşlər arasında insident baş verib. Bu hadisə barədə nə deyə bilərsiz?
- Bəli, xəbərim oldu. Amma stadionun içində olmayıb. Biz demokratik Azərbaycanda yaşayırıq. Dərəbəylik deyil. Belə şeylər olmamalıdı. Futbol meydançada bitməlidi.
Digər xəbərlər
