Ağılar və mərsiyələr xalq yaradıcılığının əsas nümunələrindəndi.

Azərbaycanda kimsə öləndə bundan istifadə edirlər. Bəzən evdə dincələn və ya istirahət edən zaman yanıqlı bir səs eşidirsən. Pəncərəni açırsan ki, bir dilənçi məlahətli səslə ağı söyləyir. Adam elə bu əziyyətinə görə həmin şəxsə 1-2 manat vermək istəyir.

“Neftçi”yə də bir ağı söyləyən lazımdı. Komandada hər şey dəyişsə də, problemləri bitmir. Yayda uzun müddət sonra flaqmanı çempion edən Samir Abasovla yollar ayrıldı ki, hədəflərə çatmayıb. Amma hamıya bəlli idi ki, mütəxəssis azarkeşlər və rəhbərliklə yola getmədiyi üçün yola salındı. Sonra rumın mütəxəssis Laurentsiu Regekampf gəldi. Çalışdırıcı elə təqdimat mərasimində dedi ki, ağlaşma qurmayıb, bəhanələr səsləndirməyəcək. Qış fasiləsinə az müddət qalmış gördük ki, “Neftçi”də işlər qaydasında getmir. Bu səbəbdən də əsas sponsor SOCAR Müşahidə Şurasının tərkibini, demək olar ki, tam dəyişdi. Şirkətin prezidenti Rövşən Nəcəf kluba rəhbərlik etməyə başladı. Bütün ictimaiyyət düşünməyə başladı ki, qışdan sonra “Neftçi” ağ günə çıxacaq. “Sabah”la oyunda gördük ki, o deyil. Əvvəllər komandada oyun nizam-intizamı var idisə, indi bundan əsər-əlamət də qalmayıb. Rumıniyalı mütəxəssis oyundan sonra bilmədi məğlubiyyəti necə şərh etsin. Başladı ağlaşma quraraq, bəhanələr gətirməyə ki, yaxşı hazırlıq keçə bilmədik, Eddi zədəlidi, komanda bir yerdə normal futbol oynamayıb.

Çox uzatmağa gərək yoxdu. “Neftçi”nin böyük dərdi var. Heç kim çarə tapa bilmir. Yazmaqla, söyləməklə, axtarmaqla həll yolu tapılmır. “Neftçi”ni qabağına qoyub ağlayan biri lazımdı. Bəlkə onun ağısı 86 yaşlı qocaya çarə olar:

Еy cəmаət, vurmayın çоx nizəvü xəncər “Neftçi”yə,
Bəsdü bu sinəsindəкi arvad dağı Regeyə
Bir tərəfdən “Qarabağ” еdər hər dəm hücum,
Bir tərəfdən dünənin “Sabah”ı edir hücum,
Bir tərəfdən üstünə еylər Rəşad Sadıqovun “Zirə”si hücum,
Bir tərəfdən оlmаyın siz də dərd rumın Regeyə
Su tək еtdülər gül kimi Eddinin qаnını
Zülm ilə göndərdilər Donyo ilə Lavalı,
Аla bilmir kapitan Eminin halallığını,
Еtmiyün bu “Bakcell Arena”nı ərsеyi-məhşər Regeyə
Çempionluqdan əl çəkdi, оldu kubokun yarımfinalı ilə məst,
Əlaqələri alınmadı, tapa bilmədi bir futbolçu sərbəst
Eylədi onminlərlə insanın sevgisi olan “Neftçi”ni şiкəst,
Solomonla Stanko dərd oldu, siz də vurmayın xəncər Regeyə
Əynində forması, boynunda şərfi olan azarkeş peşmandı bu gün,
Hər gün “Neftçi”dən yazan jurnalistlər əzrayıldı bu gün,
Müşahidə Şurasının səbri də daşmadı bu gün,
Səbr edin, dözün, cəmi 5 ay bəsdi Regeyə

İLKİN SULTANLI