"Neftçi"nin avrokubokdan kənar qalması, transfer siyasəti, Laurentsiu Regekampfın məşqçilik işi, Misli premyer-liqasının 3-cü turunda "Sabah"a uduzması futbolsevərlər və ağ-qara rənglərə könül verən fanatlar tərəfindən birmənalı qarşılanmayıb.
"Football-plus.az" saytı olaraq bununla bağlı veteran futbolçu, "Neftçi"nin Müşahidə Şurasının üzvü Səməd Qurbanovun fikrini öyrəndik:
"Avrokuboklardan erkən kənarda qalmağımız üzücüdü. Deyərdim ki, Avstriya təmsilçisiylə oyunlarda idman xöşbəxtliyi tərəfimizdə olmadı. Düzdü, hər şeyi birbaşa bəxtə bağlamaq da düz deyil. Futbolçuların fərqlənməsi üçün 100 faizlik epizodlar oldu. Amma yararlana bilmədilər. Təcrübəli futbolçular imkanları sağa-sola xərcləməməlidi. Bunu baş məşqçinin günahı saymıram. Mütəxəssis 25-30 yaşlı futbolçuya necə zərbə vurmalı olduğunu öyrətməməlidi. Biz komandanın transfer siyasətinə qarışmırıq. Bu məsələdə əsas söz sahibi baş məşqçidi. Amma yeni transferlər pis deyil. Ola bilər, hələ tam uyğunlaşa bilməyiblər".
Veteran futbolçu Laurentsiu Regekampfın işi haqda da danışdı:
"Rumıniyalı mütəxəssislə cəmi bir dəfə görüşmüşəm. Bu da "Aris"lə cavab matçında sonra idi. Məndə yaxşı təəssürat oyatdı. Məşqlərdə istəkli və enerjilidi. Sadəcə, ona zaman tanımanq və güvənmək lazımdı. İnanıram ki, Regekampf yaxşı komamda formalaşdıracaq".
Qurbanov yola salınan Samir Abasov barədə də fikrini bölüşdü:
"Samir Abasov dövrü "Neftçi"də bitib. Hər dəfə bu mövzuya qayıtmaq, danışmaq istəmirəm. Hazırda komandamızda yeni baş məşqçi var. Diqqət ona yönəlməli, necə komanda formalaşdıracağı və uğurları barədə düşünmək lazımdı. Keçmiş keçmişdə qaldı, irəli baxmaq lazımdı".
ABDULLA İSMAYILOĞLU