"Bu cür oyunlara başqa cür köklənməliyik" - Murad Musayev
Misli premyer-liqasında 8-ci tura yekun vurulur.
"Şamaxı" "Sabah"ı qəbul edib. Görüş qonaqların qələbəsi ilə başa çatıb - 1:0. Oyundan sonra paytaxt klubunun çalışdırıcısı Murad Musayevin mətbuat konfransı keçirilib. Sizi mütəxəssisin fikirləri ilə tanış edirik:
"Bu gün çox çətin oyun oldu. Rəqibin demək olar ki, meydanın hər qarışında bizə qarşı mübarizə aparırdı. Komandama təşəkkür edirəm. Bizim üçün çox da yaxşı keçməyən matçın son dəqiqələrində qol vurub qələbə qazandıq. Bu cür oyunlara başqa cür köklənməliyik. Belə qələbələr psixoloji cəhətdən çox önəmlidi".
- Oyun planında ən çox nədən narazı qaldız?
- İkili mübarizələrdə və ikinci toplarda uduzmağımızdan və əks-hücumlara sürətli çıxa bilməməyimizdən narazı qaldım. Çünki, bu, rəqib üçün oynamaq imkanı yaradırdı. Biz mövqe hücumuna keçəndə onlar rahat müdafiə olunurdu.
- "Sabah"ın "Şamaxı"da icarədə olan futbolçuları var. Onlar oyunları ilə diqqətinizi cəkə bildilər?
- Əlbəttə ki, baxırıq. Önümüzdə çox oyunlar var, özlərini göstərmək üçün vaxtları olacaq. Hər zaman onları izləyirik.
- İlk dəfə Şamaxıya gəldiniz. Burdakı ab-hava haqda nə deyə bilərsiz?
- Əlbəttə ki, qələbə qazanmışıq deyə müsbət emosiyalar var. İnsanlar oyuna gəlirlər. Stadion təbii örtüklə olsa, daha yaxşı olar. Belə azarkeşlər qarşısında oynamaq yaxşıdı.
- Namik Ələskərovun zədəsi uzun çəkdi. O, nə vaxt hazır olacaq?
- Namikin əzələsində zədə var idi. Bu zədə bir az uzun çəkdi. Hazırda ümumi qrupla məşqlərə qatılmağa çox yaxındı.
Digər xəbərlər
