Yanvarın 12-də Gənclər Liqası çərçivəsində keçirilən “Səbail” – “Neftçi” oyununda hər iki komandanın baş məşqçisi qırmızı vərəqə ilə cəzalandırılıb.

Buna onların öz aralarında davamlı şəkildə mübahisə etmələri səbəb olub. Baş hakim “Səbail”in çalışdırıcısı Müşfiq Qəmbərovla “Neftçi”nin baş məşqçisi İlyas Qurbanovu meydandan kənarlaşdırıb. Onların hər ikisi İntizam Komitəsi tərəfindən 5 oyunluq cəzalandırılıb.

Maraqlıdı, mütəxəssislər arasında baş verən mübahisəyə nə səbəb olub? Ümumiyyətlə, onlar verilən qərardan razıdılar? Bu suallara cavab tapmaq üçün hər iki komandanın baş məşqçisi ilə əlaqə saxladıq.

İlyas Qurbanov: “Oyun epizodu idi. Artıq ilk hissə başa çatmışdı, paltardəyişmə otağına gedirdik. Həmin vaxt aramızda mübahisə baş verdi. Baş hakim də bizə qırmızı vərəqə göstərdi. Orda başqa heç nə olmayıb. Nə tənqid var idi, nə də təhqir. Sadəcə, gərginlik üzündən mübahisəmiz oldu, onda da belə cəza verildi”.

Müşfiq Qəmbərov: "Dünya futbolunda da məşqçilərin gərgin münasibətinə şahidlik etmişik. Bəzi saytlar "dalaşan məşqçilər" yazıb. Amma burda dalaşmaqdan söhbət gedə bilməz. İlyas Qurbanovla uşaqlıqdan bir yerdə böyümüşük. 4 il bir yerdə oxumuşuq, əsgərliyimiz də bir yerdə keçib. İlk hissədən sonra paltardəyişmə otağına gedəndə mübahisəmiz oldu. Lakin orda qırmızı vərəqəlik heç nə yox idi. Hakim də gənc idi, yəqin ki, qərar verməkdə tələsdi. “Sarı” ilə bəlkə də razılaşa bilərdim. Amma qırmızı vərəqəlik epizod deyildi. Oyunun gərginliyindən irəli gələn yüngül mübahisə idi. Nə hakimlərə irad bildirən, nə də təhqir edən olub. Təbii ki, verilən qərardan narazıyam".

ŞAİR ABDULLA